O BNG acusa ao Sergas de "non tomar medidas correctoras" tras unha morte no ambulatorio de Lalín

Ecos da Comarca/Lalín

O BNG acusa ao Sergas "de non tomar ningún tipo de medidas correctoras tras a morte dun home no centro de saúde de Lalín en 2019". "O TSXG condenou ao Sergas a indemnizar á familia do falecido por perda de oportunidade ao acudir aos servizos sanitarios, sentenza que o Conselleiro de Sanidade declarou avaliarían a posibilidade de recorrer e que finalmente acatarán", recalca o Bloque.

O antigo centro de saúde. Autor: Páxinas Galegas.

Dende o BNG presentaban en novembro do pasado ano iniciativas parlamentares ao respecto deste caso tras coñecer as declacións do conselleiro de Sanidade ao referirse á sentenza onde o Servizo Galego de Saúde saía mal parado e que as nacionalistas califican de “carentes de sentido da xustiza e de dunha falla de empatía total”.

Dende o BNG cuestionaron nese momento que se recorrera a sentencia que lle daba a razón á compañeira do falecido e que implicaba unha indemnización de 20.000 euros, que en ningún caso, devolvería a vida ao varón de 70 anos que ficou sen vida 6 horas despois de acudir ao centro de saúde lalinense. Apelaba a deputada nacionalista e lalinense Ariadna Fernández naquel momento a cumprir co fallo “por unha cuestión de xustiza e sobre todo, asumindo que os erros no Sergas poden custar vidas”.

Publicidade

Preme na imaxe para obter máis información do evento.

"Estas situacións, derivadas dunha mala xestión da triaxe e que agrava aínda máis

a precarización do servizo público de Sanidade por parte da Xunta de Galiza, poden levar

por diante vidas ou causar danos irremediables, sen que as profesionais sexan as

culpables, simplemente o Sergas non se dota dos recursos necesarios nin a nivel persoal nin material e quen o pagan son os doentes e as súas familias, que se ven infraatendidos, algo que en Lalín é frecuente, por desgraza”, recalca o BNG.

Publicidade

Preme na imaxe se queres contactar connosco.

A gravidade dos feitos, segundo Ariadna Fernández, reside en que “o que ocorreu fai 6 anos con este doente que sufriu unha perda de oportunidade ao non ser debidamente atendido, pode volver pasar en calquera momento, xa que non se tomaron medidas ao respecto e as eivas seguen a ser exactamente as mesmas”. Reitera que están preocupados "pola deriva do noso sistema sanitario e solicítalle ao goberno lalinense que inste ao goberno galego a que tome cartas no asunto e proceda a corrixir as eivas que sufrimos todas e todos os lalinenses".