Ecos da Comarca/Palas de Rei
O alumnado do CEIP de Palas de Rei, finalmente, apadriñou as 72 árbores autóctonas prantadas nas instalacións do hipódromo de Vilar de Donas. Os nenos e nenas, acompañados polos respectivos profesores, xunto cos integrantes da Asociación a Capela de Vilar de Donas, organizadora do evento, ademais da dirección Obradoiro de Emprego Camiño de Santiago II, foron desenvolvendo o acto de apadriñamento de cada unha das árbores, de maneira que cada dous alumnos/as apadriñaban unha árbore.
Esta actividade enmárcase dentro da programación prevista pola Asociación A Capela de Vilar de Donas, con motivo do día da árbore, co obxectivo de concienciar ao máis novos sobre a importancia das árbores autóctonas como fonte de vida e o respecto e a protección das superficies arboradas. Para isto, contou coa colaboración do CEIP de Palas de Rei, do Concello, do Obradoiro de emprego Camiño de Santiago II, Alibós e Granxas Campomaior.
A súa vez, os nenos e nenas tamén escoitaron as indicacións previas sobre a importancia das árbores como fonte de vida no ecosistema por parte de Alicia López, enxeñeira agrícola e directora do Obradoiro Camiño de Santiago II. Despois do acto de apadriñamento, desfrutaron dunha xornada de recreación no espazo verde que ofrecen ditas instalacións.
Comments