O Agrocuir da Ulloa celebrarase os días 23 e 24 de agosto

Hoxe, luns, inaugurarase "Expo Cuir", a cargo da fotógrafa Zoe Vixión

Ecos da Comarca/Monterroso

No marco da novena edición do festival Agrocuir da Ulloa, terá lugar a "Expo Cuir", a cargo da fotógrafa Zoe Vixión. Zoe, cunha longa traxectoria profesional vinculada ao teatro e a fotografía, é unha persoa importante para o Colectivo Agrocuir e moitos outros colectivos culturais da Comarca da Ulloa, cos que colabora a través dun proceso de documentación gráfica que vén facendo durante estes últimos anos.

Fonte: Festival Agrocuir da Ulloa

"ExpoCuir" documenta a convivencia no Festival Agrocuir durante as edicións de 2022 e 2023, aportando a súa propia visión sobre o encontro e a diversidade. A exposición conta cunha parte interactiva e tamén cunha peza en defensa da nosa terra, feita mán a man co proxecto Argalleira.art

A exposición inaugurarase hoxe luns 19 de agosto, ás 12 horas no Centro Cultural Lorenzo Varela de Monterroso, e será visitable ata o 30 de agosto, en horario de mañá.

Ademais, terá lugar a proxección dunha curtametraxe chamada O primeiro día na auga, creada por Zoe en colaboración con Paleira Electrónica e premiada co premio do xurado no festival de Finde Curta de Lugo.

Publicidade

Preme na imaxe se queres contactar connosco.

"Énchenos de orgullo presentar xuntes esta completa exposición que non deixará a ninguén indiferente", sinalan dende a organización do Agrocuir da Ulloa.

A temática desta IX edición do Agrocuir será a defensa do territorio, nun contexto de ameaza provocado polo proxecto de construcción dunha mega fábrica de celulosa. Terá lugar os días 23 e 24 de agosto.