O 29 Rali do Cocido celebrarase o 7 e 8 de marzo en Lalín e Rodeiro

Onte tivo lugar a presentación oficial

Ecos da Comarca/Lalín

Onte, luns, tivo lugar a presentación da 29 edición do Rali do Cocido que terá lugar os vindeiros 7 e 8 de marzo nos concellos de Lalín e Rodeiro e que será a primeira proba do Campionato Xunta de Galicia de Rallys Recalvi.

O secretario xeral para o Deporte, José Ramón Lete Lasa, destacou a importancia do deporte base, especialmente en deportes como automobilismo que conta con medio centenar de licenzas 6-16 entre as preto de 3.000 fichas federativas. Dentro destas promesas do automobilismo destacou o silledense Christian Costoya que con 14 anos é o cuarto mellor piloto de karts de todo o mundo segundo o Ranking Internacional de Karting da FIA.

O mandatario galego tamén subliñou o excelente traballo do automobilismo galego e de rallys como o do Cocido, que permiten que Galicia sexa referente no motor. Deste xeito lembrou que a nosa comunidade conta con nove probas no calendario nacional como son os eventos de Carballo e Arteixo no Campionato de España de Autocross; o ECO Rallye da Coruña do Campionato de España de Enerxías Alternativas; o Rías Altas do Campionato de España de Vehículos Históricos; a Subida a Chantada do Campionato de España de Montaña; o Rally de Terra de Galicia do Campionato de España de Rallys de Terra; o Cidade de Narón da Copa de España de Rallys de Asfalto; así como o Rallye Rías Baixas e o Rally de Ourense que estarán, un ano máis, no trofeo máis importante de todos: o Supercampionato de España de Rallyes.

Publicidade    

Preme na imaxe se queres contactar connosco.

Lete Lasa gabou o traballo da Escudaría Lalín-Deza, que realiza un traballo espectacular para garantir o éxito do Rali do Cocido, que leva celebrándose dende o ano 1996. Neste sentido, reivindicou o rally dezán como “un dos mellores de Galicia e de toda España, polo que asegurou que pronto volverá estar no circuíto estatal”. Neste sentido lembrou o duelo da edición do ano pasado entre o piloto da escudaría local, o melidense Alberto Otero, e Víctor Senra que gañou o Rali do Cocido e, ademais, o seu oitavo título de campión galego de rallys.

Máis datos da presentación no vídeo e na web: https://www.ralidococido.com/