O 061 de Galicia aconsella precaución co alcohol, a condución e o lume das fogueiras en San Xoán

A Central de Coordinación do 061 reforza o seu persoal ante o incremento do número de chamadas por intoxicacións, accidentes de tráfico e queimaduras

Laura Moure/Xeral

A Fundación Pública Urxencias Sanitarias de Galicia-061, servizo que coordina as urxencias e emerxencias sanitarias na comunidade galega, recomenda ter precaución co consumo de alcohol, a condución e o lume das fogueiras para evitar incidentes durante a celebración da noite de San Xoán, que terá lugar hoxe. Un ano máis, a Central de Coordinación do 061 reforza o seu persoal na franxa horaria que ten lugar esta celebración ante o incremento da demanda sanitaria. Así, as intoxicacións etílicas ou por drogas, os accidentes de tráfico e as queimaduras  producidas no ámbito das cacharelas constitúen a causa principal das chamadas de consulta e asistencia sanitaria.

No caso de celebrar a tradicional festividade das fogueiras de San Xoán é importante seguir os seguintes consellos:

• En primeiro lugar, as fogueiras supoñen un compoñente de perigo, tanto polo lume como polo fume producido nas mesmas. Por iso, é importante elixir o sitio onde facer as cacharelas. Non debe ser en lugares pechados, evitando a proximidade de cables de alta tensión, e sempre vixiando a altura e a distancia do lume a estes.

• Para prender as fogueiras non deben utilizarse líquidos inflamables e non se debe arroxar ao lume envases herméticos, sprays, pilas, nin manipular petardos na súa proximidade. É recomendable ter sempre a man extintores ou auga por se fora necesario. Unha vez prendido o lume, débese evitar que os nenos se acheguen ás fogueiras e cómpre extremar as precaucións.

• Urxencias Sanitarias de Galicia-061 aconsella situarse de costas á dirección do vento, especialmente se se sofre dalgunha patoloxía respiratoria, para evitar que as chamas e o fume se dirixan cara a persoa e así non sufrir lesións por lume e inhalación de fumes.

  
  

Publicidade

Preme na imaxe para obter máis información do evento.

• Á hora de saltar as cacharelas débense evitar as pezas de roupa sintéticas e utilizar preferiblemente as de algodón. No caso de que a súa roupa prenda lume, non corra. Só conseguirá avivar as lapas e dificultar que as apaguen. Tírese ao chan e móvase ou quede quedo mentres as apagan.

• Se algunha persoa sofre algún tipo de queimaduras, é importante alertar ao 061 inmediatamente. Mentres chega a axuda, o médico da Central de Coordinación daralle os consellos necesarios. Como norma xeral, é útil lavar con abundante auga a zona afectada se a queimadura é de pouca extensión. No caso de que sexa extensa, non utilice auga fría por risco de hipotermia.

• Tamén é importante non conducir baixo os efectos do alcohol ou drogas, xa que o consumo destes pode propiciar somnolencia e falta de reflexos, condicións que favorecen os accidentes de tráfico.

  
  

San Xoán 2024

Urxencias Sanitarias de Galicia-061 atendeu na noite de San Xoán do ano pasado 61 intoxicacións etílicas ou por drogas, sete accidentes de tráfico, con sete persoas implicadas, e cinco queimaduras provocadas polas fogueiras. O período contabilizado foi desde as 21.00 horas, do domingo 23 de xuño, ata as 09.00 horas, do luns 24 de xuño.

A Coruña con 36 intoxicacións etílicas ou por drogas foi a provincia que rexistrou o maior número de atencións, seguida da Pontevedra con 18, Lugo con cinco e Ourense con dúas persoas atendidas. 35 persoas foron atendidas no punto e non requiriron traslado e 26 foron trasladadas a centros sanitarios.

Publicidade

Preme na imaxe se queres contactar connosco.

As queimaduras atendidas polo 061 na noite de San Xoán foron cinco. Urxencias Sanitarias de Galicia-061 asistiu catro persoas en Pontevedra e unha persoa na Coruña. Todos os pacientes necesitaron ser trasladados a un centro hospitalario.

No caso dos accidentes de tráfico, foron asistidas sete persoas en sete accidentes de tráfico. Pontevedra rexistrou tres accidentes de tráfico; A Coruña e Lugo rexistraron dous accidentes de tráfico respectivamente. Do total de persoas atendidas, cinco foron trasladadas a centros sanitarios e dúas foron asistidas no punto sen necesitar traslado.