Nace en Rodeiro a Asoc. Gandeira de Rubia Galega do País tras o Sabor Labrego promovido por Lamazares
- Laura Moure
- 26 sept 2024
- 3 Min. de lectura
O 20 de outubro este colectivo recuperará e levará a cabo en Camba a XIII Feira da Vaca Rubia Galega do País
Laura Moure/Rodeiro
Coa idea de potenciar as diferentes producións alimentarias do concello de Rodeiro e impulsar outras minoritarias naceu Sabor Labrego "onde dende a Concellería de Sector Primario buscamos poñer en valor e promover as potencialidades do sector agro alimentario de Rodeiro", sinala o tenente de alcalde, Alberte Lamazares, que foi o que impulsou esta iniciativa celebrada o pasado maio e que foi un éxito. A raíz desta informa que agora nace a Asociación Gandeira de Rubia Galega do País que no mes de outubro levará a cabo dúas actividades.
"Relacionado co sector da carne foi a primeira iniciativa levada a cabo, unha reunión con
gandeiros e gandeiras de Rodeiro onde escoitamos as súas necesidade e realizamos as
nosas propostas", explica Lamazares que ademais indica que son as seguintes:
Impulso dunha poxa, exposición e concurso de Rubia Galega.
Impulso de iniciativas que incidan na recuperación e mellora xenética dos rasgos
morfolóxicos característicos desta raza neste concello.
Dobre vía xenética de recría e cebo.
Cooperación local para a finalización dos becerros/as.
Eficiencia na produción.
Diferenciación en posta en valor para conseguir mellores rendementos económico.
Para lograr materializar todo isto, en vindeiras reunións, chegaron á conclusión de que
unha ferramenta imprescindible é a autoorganización, e estando todos e todas dacordo impulsaron dita asociación que traballará xunto e acompañada da Concellería de Sector Primario, Economía, Educación e Xuventude, que lidera o propio Alberte Lamazares.
Está composta polas seguintes persoas:
Presidencia, Alberto Hermida Taboada.
Vicepresidencia, Diego Mazaira Fafian.
Secretaria, Tamara Sobrado Deza.
Tesoureiro, Bruno López García.
Vogal 1, Sonia Diéguez Salgado.
Vogal 2, Manuel Villanueva Panadeiros.
Vogal 3, Óscar Fernández Aguiar.
Vogal 4, Elvito Cuñarro Fente.
"Dita asociación ten vocación de asociar a gandeiros e gandeiros, non só da localidade de
Rodeiro, senón que pretende abarcar o conxunto da provincia de Pontevedra sen rexeitar socios de outras localidades. Como primeiras actividades desta organización está a vindeira xornada que se levará a cabo no centro cultural Manuel Lamazares o día 1 de outubro onde se pretende poñer en valor as diferentes instrumentos como Acruga, Tenreira Galega ou Finca de Mouriscade", destaca Lamazares.
Publicidade
A segunda actividade, compartindo organización co Concello de Rodeiro é a recuperación e execución da XIII Feira da Vaca Rubia Galega do País que se celebrará o vindeiro 20 de outubro do 2024. "Esta feira, denominada antes como Feira da Vaca Rubia Galega deixouse de facer no ano 2007 sendo daquelas unha feira de referencia en todo o territorio galego onde, nesa última edición participaron mais de 100 animais". "Con este evento pretendemos poñer en valor o vacún de carne da Raza Rubia Galega coas características morfolóxicas que destacan no interior da provincia de Pontevedra coñecida en Rodeiro como a vaca “do País. Este é un gran factor de diferenciación que queremos recuperar. Ao mesmo tempo, sendo este o único evento destas características na nosa provincia, lograremos potenciar e dar a coñecer o noso concello e as súas potencialidades. En definitiva, a recuperación da Feira da Vaca Rubia Galega é algo estratéxico e simbólico para o rural Cambote e Provincial", subliña o tenente de alcalde.
A proposta, que está previsto desenrolar ao longo da mañá do día 20, contará en primeiro lugar cunha poxa de xatos e xatas. Haberá arredor duns 10 animais. En segundo lugar, celebrarase o concurso de gando no que participarán entorno a 50 animais e no que se entregarán 15 recoñecementos distribuídos en cinco categorías. "Por último cerraremos a feira coa intervención de diferentes autoridades que nos acompañaran", conclúe Lamazares.
Comments