top of page

“Mulleres de Seu” celebra o día 15, Día da Muller Rural, un encontro de Mulleres Rurais en Melide

A asociación conmemora 10 anos traballando polo empoderamento feminino no rural galego


Laura Moure/Melide

“Mulleres de Seu” é unha asociación impulsada en 2013 pola cooperativa agrogandeira

CLUN para fomentar a visibilidade, o empoderamento e o desenvolvemento profesional e

persoal das mulleres no rural. É un grupo interxeracional de mulleres gandeiras, integrado

por socias de CLUN que viven e traballan en zonas rurais dos concellos de Ames, Ribadeo e Melide. Coincidindo coa celebración do Día Internacional da Muller Rural (15 de outubro), poñen en marcha unha serie de actividades para conmemorar o seu 10º aniversario.

O empoderamento das mulleres rurais

“Os nosos grandes obxectivos son empoderar e motivar ás mulleres rurais para fomentar

o seu liderado, traballar pola visibilidade e o recoñecemento do papel das mulleres no

ámbito rural. Buscamos a igualdade de oportunidades real e efectiva entre homes e

mulleres. E tratamos de contribuír á transformación do rural como motor de

emprendemento e innovación, como un medio sostible e como un lugar onde vivir e

traballar”, manifesta Carmen Rodríguez, vicepresidenta da cooperativa CLUN e presidenta

de “Mulleres de Seu”.


Rodríguez sinala que, para conseguir os seus obxectivos “formamos profesionalmente ás

mulleres como empresarias e gandeiras, tratamos de sensibilizar á sociedade para mudar

estereotipos de xénero e avanzar no camiño da igualdade e a responsabilidade social,

impulsamos a presenza feminina na vida cooperativa e nos cargos de responsabilidade e

representación, ao tempo que atendemos o aspecto emocional das mulleres como unha

vía relevante para axudalas a cumprir as súas aspiracións”.


Publicidade

Un plan de formación para mellorar o desenvolvemento persoal das mulleres

“Mulleres de Seu” celebra o seu 10º aniversario poñendo en marcha un novo plan de

formación para o período 2023-2024 baixo o lema Para Nós, unha serie de talleres

persoais e de autocoidado cos que se pretende mellorar o benestar físico e emocional das

mulleres, reforzar o seu traballo diario de empoderamento e potenciar o seu

recoñecemento profesional como mulleres rurais. Nesta liña, abordaranse aspectos como

a nutrición, a beleza, o mindfulness… “Nacemos para visibilizar a presenza e a

profesionalidade das mulleres na gandería, dando importantes pasos ao longo destes

anos, e agora traballamos polo noso empoderamento a través do desenvolvemento

persoal”, indica a presidenta de “Mulleres de Seu”.


Con motivo do 10º aniversario, a través das redes sociais de CLUN (Instagram, Facebook e

TikTok) vanse difundir historias das mulleres da asociación, unha nova sección titulada Mulleres gandeiras de CLUN que formará parte das redes da cooperativa con novas

entrevistas cada mes. Ademais, durante uns días, a nova canle de TikTok da cooperativa

estará en mans de Lucía Casal, unha moza influencer gandeira, socia de CLUN e membro

de “Mulleres de Seu”, tiktoker con preto de 15.000 seguidores que recibiu este ano o

Premio Nacional de Juventud na categoría de Medio Ambiente -un galardón que concede

o Instituto de la Juventud en España (Injuve), dependente do Ministerio de Asuntos

Sociales y Agenda 2030-. Desde a súa granxa familiar de vacas, situada nunha aldea de

Melide, amosa cada día como é o seu oficio, achegando o traballo das mulleres gandeiras

á poboación máis nova.


Xuntanza de Mulleres Rurais

Ademais, este domingo 15 de outubro, con motivo da celebración do Día da Muller Rural,

a asociación “Mulleres de Seu” reunirase en Melide no encontro de Mulleres Rurais

organizado pola Asociación Alecrín. Este evento servirá como homenaxe ás traballadoras

do rural e contará con institucional, acollendo a personalidades como Susana López

Abella, conselleira de Emprego e Igualdade ou Ángeles Vázquez Mejuto, conselleira do

Medio Rural.


Publicidade

Loitas e recoñecementos

Ao longo destes anos, representantes de “Mulleres de Seu” levaron as súas demandas a

Bruxelas, ao Congreso dos Deputados e ao Parlamento de Galicia. E teñen recibido importantes recoñecementos ao seu labor como o Premio á Igualdade de Oportunidades

por parte de Cooperativas Agroalimentarias de España; o Premio pola Innovación da

Muller no Rural da Axencia Galega de Desenvolvemento Rural (Agader); a Medalla Emilia

Pardo Bazán da Xunta de Galicia, un recoñecemento público polas accións realizadas en

Galicia que contribúen á defensa da igualdade; e o Premio Muller Agro, que outorgan

Siete Agromarketing e Comercio Agrario, un premio moi especial para a asociación dado o

gran recoñecemento que desde a Consellería fixeron polo traballo que realizan en

“Mulleres de Seu”.

0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page