Laura Moure/Silleda
OS certames Motor Ocasión Galicia e Auto Classic, organizados pola empresa Sac Events, abriron este venres as súas portas no recinto Feira Internacional de Galicia ABANCA. En canto ao Salón Motor Ocasión Galicia, levará a cabo a súa cuarta edición, consolidándose entre as citas anuais no calendario do recinto. O certame mostrará sobre 600 vehículos de segunda man de todas as marcas e modelos, con gran diversidade de prezos, desde os máis económicos ata coches de alta gama que roldan os 190.000 euros. Son concesionarios e empresas de compra-venda de distintos puntos de Galicia os que poñen á venda estes vehículos, sobre os cales realizarán importantes descontos e ofrecerán as mellores garantías. Pola súa banda, Auto Classic estará centrado nos vehículos clásicos e levará a cabo a súa primeira convocatoria. Contará con exposición e venda duns 200 coches e motos antigos, así como todo tipo de pezas para restauración e outras empresas relacionadas. Estes certames, que se estenderán ata mañá, domingo, terán lugar nos dous pavillóns principais do recinto. O horario é de 11:00 a 21:00 horas.
Comments