Prevese que as actuacións se leven a cabo no prazo dun mes
Laura Moure/Monterroso
O Concello de Monterroso continúa a mellorar as vías municipais. Vén de adxudicar as obras para a mellora de 1.275 metros dende a Nacional 540 ata o remate da aldea de Pol, 300 metros en Sucastro, 850 metros dende Sirgal ata Seteigrexas, 500 metros dende o polígono ata Sirgal, 1000 metros dende a LU-3305 ata Vilamaior, 170 metros dende a LU-221 ata o núcleo de San Pedro de Framéan, 600 metros ata o cementerio de San Breixo, 650 metros percorrendo o núcleo de Tarrío de Buxergos ata a finalización do mesmo, 1.100 metros unindo pequenos núcleos ao longo da parroquia de Fufín, e 1.400 metros dende Pedraza ata o acceso a unha das explotacións máis próximas. Estas obras prevense realizar no prazo dun mes logo da adxudicación á empresa Construcciones y obras Taboada y Ramos SLU por importe de máis de 240.000 euros.
Así mesmo está en licitación a mellora da vía dende A Ponte dos Carros ata Leborei e
Vilanova por importe de 55.000 euros e que prevé o arranxo de máis de un quilómetro e
medio para poder dar accesibilidade a vehículos pesados e aliviar a carga da ponte de
Leborei e do seu núcleo.
No núcleo urbano xa están rematados os proxectos para poder executar obras rúa
Concepción Arenal para mellorar a accesibilidade e seguridade de acceso ao centro de
saúde, gardería e cámara agraria. Ademais tamén se mellorará a rúa Rosalía de Castro.
A alcaldesa, Rocío Seijas, destaca "a importancia e o compromiso por mellorar as vías de
comunicación e facer un esforzo económico coa axuda económica doutras administracións así como con remanentes do Concello actuando en máis de 10 quilómetros de lonxitude nestes próximos meses". Ademais, a rexedora sinala "que é prioritario mellorar a calidade de vida dos monterrosinos e fomentar a vida no rural mellorando os servizos e vías de comunicación, un compromiso adquirido no momento de entrada no goberno hai escasos dous anos".
Comments