Melide mellorará a iluminación, son e tramoia do auditorio do Centro Sociocultural Mingos de Pita

O espazo adquirirá novo material e un terzo do seu financiamento procederá dunha subvención autonómica, asumindo o resto con fondos municipais

Laura Moure/Melide

O Concello de Melide adquirirá e instalará durante o presente mes de outubro maquinaria escénica por un valor total próximo aos 18.000 euros no Centro Sociocultural Mingos de Pita. Con este investimento, o Concello porá solución ás carencias en equipamento escénico do auditorio, que ata o de agora non puido aproveitar todo o seu potencial.

Esta iniciativa permitirá converter o auditorio do recinto nun equipamento público axeitado

para actuar como importante espazo cultural local. Ademais, permitirá incrementar as

posibilidades das actuacións que teñan lugar sen ter que recorrer ao alugueiro de

equipamentos externos, reducindo deste xeito a achega económica que para o Concello

supoñen as contratacións extraordinarias. O investimento redundará, xa que logo, na

comodidade das compañías e espectadores do auditorio, así como na calidade técnica

das representacións.

A adquisición de nova maquinaria dotará o auditorio da estrutura necesaria para dar

soporte a equipos de iluminación, son e tramoia. O equipamento escénico que se

adquirirá comprende un sistema de colgado fixo co que dar soporte a aqueles elementos

necesarios nas representacións que non forman parte da estrutura do auditorio. O equipamento a mercar inclúe tres truss de aluminio triangular; dous polipastos

eléctricos de cadea de 250 quilogramos; dúas varas electrificadas en tubo de aluminio cadrado de nove circuítos; dous adaptadores para elevar e suspender o truss; un mando

de motor de armario fixo; un pantógrafo para fíos de cinta plana na vara de carga; unha

liña de cinta plana de 18 circuítos de 25 metros; unha subministración e instalación de

sinal de DMX no truss e un dimmer de seis canles.

Preme na imaxe se quere contactar connosco.

O investimento para a adquisición de material será de 17.670 euros. Desta cantidade,

6.926, serán achegados pola Xunta de Galicia a través dunha subvención para

equipamento de maquinaria escénica concedida pola Consellería de Cultura da Xunta de

Galicia. O resto do investimento, aproximadamente dous terzos do total, será achegado

polo Concello.