O prazo de solicitude estará aberto ata o 30 de setembro a través da web
Laura Moure/Lalín
A subdelegada do Goberno en Pontevedra, Maica Larriba, animou hoxe aos preto de nove mil mozos e mozas da provincia de Pontevedra que ao longo deste 2023 cumpren os 18 anos a que soliciten o Bono Cultural, unha axuda do Goberno de España para fomentar o hábito de consumo de cultura en todas as súas variantes entre a xente máis nova. Fíxoo en Lalín, onde visitou a Librería Álvarez, unha das máis emblemáticas da localidade dezá.
Durante a visita a este establecemento adherido á iniciativa, intercambiou impresións co seu xerente, Anxo Álvarez, coincidindo ambos no interese que está a espertar o Bono
Cultural e no seu impacto positivo, tanto polo fomento do consumo de cultura entre a xuventude, como pola inxección económica que supón para o sector.
A subdelegada do Goberno lembrou que o prazo para a solicitar o Bono Cultural
Mocidade 2023 estará aberto ata o 30 de setembro a través da web bonoculturajoven.gob.es . Unha vez concedido os beneficiarios terán un ano para
gastar os 400 euros que contempla esta axuda en adquirir e gozar de produtos e
actividades culturais. Nesta segunda edición poden solicitalo todas as mozas e
mozos nados en 2005.
Divídese en tres apartados, para fomentar o descubrimento e o acceso a diversas expresións culturais: 100 euros para produtos físicos, por exemplo, libros, prensa ou discos. 100 euros para produtos dixitais, como prensa dixital, podcast, videoxogos en liña e plataformas virtuais e 200 euros para artes vivas: teatro, ópera, cinema, danza, ou museos.
Publicidade
A subdelegada lembrou que a de 2023 é a segunda convocatoria tras o éxito da de 2022, na que participaron o 56% dos mozos e mozas de Pontevedra que cumpriron os 18 o ano pasado. En concreto, segundo os últimos datos, foron concedidos 4.861 bonos a mozos e mozas pontevedresas, que realizaron 14.560 operacións por un valor de 567.700 euros, “o que reflicte, non só o gran aproveitamento que a mocidade fai desta iniciativa, senón a gran impulso a nivel económico que supón para o sector cultural”
Publicidade
Maica Larriba recordou que “ademais, dos mozos e mozas, é tamén necesario que as empresas provedoras dos servizos culturais estean anotadas na web do Ministerio de Cultura, porque o bono non funciona en empresas non adheridas”. O prazo para que as entidades se sumen tamén está aberto ata o 30 de setembro de 2023. A subdelegada explicou que na pasada edición foron 105 as entidades da provincia adheridas e, por iso, animou “a que máis establecementos e empresas do ámbito cultural adhíranse ao Bono Cultural, porque insisto, é unha iniciativa que impulsa a cultura da xuventude e axuda ao mundo cultural economicamente de maneira moi importante”.
Nesta liña sinalou que “para o sector cultural da provincia os máis de 3,5 millóns de euros de subvención para estes nove mil mozos e mozas son unha moi boa noticia e un gran impulso para a súa economía”.
Comments