Lalín acolle a presentación do libro infantil “O tesouro do Castro da Veiga”

Xoán Carlos García Porral é autor do texto, Santiago Gómez Fuentes, o encargado da realización do xogo e Gabriel Iglesias Sanmartín deulle vida a través das ilustracións

Laura Moure/Lalín

O Museo Ramón María Aller de Lalín, acolle este xoves 12 de setembro, ás 20:30 horas, a

presentación do libro infantil O tesouro do Castro da Veiga, publicado por Edicións

ervenza, e do que o lalinense Xoán Carlos García Porral é autor do texto, Santiago Gómez Fuentes foi o encargado da realización do xogo que se pode atopar neste libro e ao que se accede a través de internet e Gabriel Iglesias Sanmartín foi o encargado de darlle vida a través das ilustracións. No acto, os autores estarán acompañados pola concelleira de Cultura do Concello de Lalín, Begoña Blanco e do secretario xeral da Lingua da Xunta de Galicia, Valentín García.

Durante a presentación darase a coñecer o xogo dixital, que se inclúe nesta publicación, o

Xogo do tesouro do Castro da Veiga, con acceso a través de código QR.

O libro

O tesouro do Castro da Veiga preséntase como un álbum ilustrado a toda cor e en tapa dura, no que os lectores máis cativos descubrirán unha asombrosa lenda da comarca de Deza. Trátase da terceira parte da triloxía sobre a mourindade de Deza elaborada por Xoán Carlos García Porral, e publicada por Edicións Fervenza, cuxas historias son extensibles a toda a comunidade galega e a aquelas zonas nas que os mouros, mouras e tesouros forman parte do imaxinario colectivo.

A primeira obra en saír foi As tres mouras da Fonte Lantana dedicada ás mouras, a segunda Antón e a moura do Lameiro de Viana está dedicada aos mouros, mentres que esta última pretende ter como tema central os tesouros.

Publicidade

Preme na imaxe para obter máis información.

Unha triloxía ilustrada para nenos, mozos e maiores na que estes seres e obxectos mitolóxicos cobran vida e son postos en valor nunha época na que a perda da memoria colectiva supón unha eiva na identidade comunitaria. Tal como comenta o autor do texto, Xoán Carlos García Porral: “Coa adaptación desta lenda nun formato de conto infantil trátase de achegar aos máis cativos unha das tantas historias da tradición oral que, nos tempos nos que a lectura era un luxo para poucos, só as narracións contadas permitían transmitir ensinanzas con moita retranca e simbolismo converténdose en parte da nosa propia cultura”.

Nese afán por protexer e transmitir o noso ás xeracións vindeiras, nace esta triloxía na que,

cunha simboloxía chea de aprendizaxe, os encantamentos e a avaricia se erguen como un

protagonista máis. Cabe destacar que as últimas páxinas dos tres títulos inclúen un apartado didáctico con explicacións e actividades para que os máis pequenos comproben o aprendido e descubran porque é tan importante manter vivas as lendas ancestrais.

Publicidade

Preme na imaxe para obter máis información.

Código QR

Ao igual que no anterior título, Antón e a moura do Lameiro de Viana, esta obra inclúe un código QR con acceso a un xogo dixital no que aprender máis sobre a lenda deste libro, O

tesouro do Castro da Veiga. O autor do xogo, Santiago Gómez cóntanos que a realización deste xogo: “Está pensado para que sexa un cumprimento ao libro e así dunha maneira distinta teña unha función de aprendizaxe ao que tanto as persoas cativas como as adultas poderán ter acceso de xeito totalmente gratuíto”.

Colaboraron na publicación do libro

A publicación do libro “Antón e a Moura do Lameiro de Viana”, editada por Edicións Fervenza, contou coa colaboración da secretaría xeral da Lingua da Xunta de Galicia.