Ten 27 anos de idade, é profesor de música nun colexio do municipio ourensán de Lobios e está moi vinculado á actividade musical e cultural
Laura Moure/Lalín
Javier Carballude Iturburua, nado en Elizondo (Navarra) en 1995 e desde hai 25 anos afincado no lugar do Souto (Xaxán), vén de presentar a súa candidatura para optar á presidencia de Novas Xeracións de Lalín no Congreso Local que a organización da mocidade do Partido Popular celebrará o vindeiro día 17, a partir das 19.00 horas, no Pazo de Liñares.
O aspirante a suceder a Eva Montoto na presidencia de NNXX conta co Grado Superior de Música e o Grao en Educación Primaria na Mención de Especialización Curricular e desde 2022 é profesor con praza na Consellería de Cultura, Educación, Formación Profesional e Universidade, traballando actualmente nun colexio do municipio ourensán de Lobios. Ademais, leva anos vinculado á actividade musical e cultural de Lalín, tanto como director asistente da Banda Xuvenil de Lalín como de xefe de estudos, profesor de Linguaxe Musical e de Saxofón na Escola de Música da Banda de Lalín.
Javier Carballude, que no Congreso Local do PP de Lalín celebrado en decembro ofrecera unha ponencia relacionada coa liberdade ideolóxica no sector cultural, adiantou que a veciña de Lalín Sonia Rivas, de 26 anos de idade e mestra nun centro educativo especial de Vigo, acompañarao na lista como candidata a ocupar a vicepresidencia.
Commentaires