Isabel Rodríguez agradece o labor dos funcionarios dos cárceres de Monterroso e Bonxe

"Teñen a sorte de contar cun persoal con vocación e compromiso co traballo tan importante que están a realizar na sociedade”, destaca

Laura Moure/Monterroso

A subdelegada do Goberno en Lugo, Isabel Rodríguez, presidiu o pasado venres os actos organizados con motivo da celebración do Día da Mercé, patroa das Institucións Penitenciarias, na que se fixeron entrega de recoñecementos a 35 traballadores da provincia. A subdelegada destacou que os centros “teñen a sorte de contar cun persoal con vocación e compromiso co labor tan importante que están a realizar na nosa sociedade”. No acto, que contou coa participación dos alcaldes de Lugo, Monterroso e Outeiro de Rei, así como os directores do Centros Penais de Bonxe e Monterroso, a subdelegada resaltou o traballo diario dos funcionarios de prisións para que as persoas internas “teñan habilidades e oportunidades para saír adiante”.

“A vosa misión integradora con eles é admirable, así como o esforzo que realizades para inculcarlles valores de respecto e esforzo que se ve recompensado” recoñeceu Isabel Rodríguez. Así mesmo, a subdelegada aproveitou o acto para por en valor a colaboración coas Forzas e Corpos de Seguridade do Estado, “que xuntos garanten a integridade de todos os lucenses”.

Publicidade

Preme na imaxe para obter máis información!

Condecoracións

Durante a celebración fixéronse entrega de varias condecoracións que recoñecen o traballo ao persoal dos Centros de Bonxe e Monterroso e colectivos. En concreto, entregáronse 34 das 35 condecoracións totais.

Este ano foron condecorados coa Medalla de Prata ao Mérito Penal o administrador do Centro Penal de Monterroso, José Antonio Rodríguez; o administrador do Centro Penal de Bonxe, Miguel Ángel Blanco, e os funcionarios Mónica Rodríguez e José Antonio Hermida, pola conduta mantida con motivo da violencia terrorista como membro do persoal do Centro de San Sebastián no 2007.

Publicidade

Preme na imaxe se queres contactar connosco.

A Medalla de Bronce ao Mérito Penal foi recibida por Carlos Carmiña e José Luis Sánchez. Este ano foron galardoados coas Medallas de Bronce ao Mérito Social Penal o Club Fluvial de Lugo; o técnico de mantemento da Empresa CLECE, Javier Neira, e o integrante da Unidade Cinolóxica da Garda Civil, Luís Hierro. Do mesmo xeito, outorgáronse 8 das 9 mencións honoríficas a varios funcionarios, nos que se atopan un xefe de servizos, un xefe de área mixta e un encargado. Outro mérito recoñecido foron os 25 anos de servizo dos traballadores, entregándose a 9. Para finalizar a cerimonia, déuselles a algunhas autoridades a figura dunha menina conmemorativa.