Hai máis de 52.000 persoas en Galicia con incapacidade permanente total e poden seguir traballando

COGAMI leva anos acompañándoas para que volvan ao mercado laboral: só nos últimos 5 anos, 2.800 persoas xa atoparon emprego

Ecos da Comarca/Xeral

Segundo estatísticas da Seguridade Social, con data deste ano, en Galicia hai rexistradas 52.716 persoas que contan co certificado de incapacidade permanente total, que recoñece que a persoa, debido a unha enfermidade grave, a un accidente que pode ser laboral ou non, ou por condicións crónicas limitantes para a profesión que desempeña, queda inhabilitada para desenvolver o traballo habitual pero non para realizar outras actividades laborais diferentes.

Moitas destas persoas reciben esta prestación cunha idade media de 55 anos, e queren seguir sendo operativas no mercado laboral, reciclarse para poder optar a un posto que poidan desenvolver sen prexudicar a saúde. Por iso chegan a COGAMI e contactan coa área de Emprego, especializada na atención de persoas que teñen o certificado de discapacidade do 33% como mínimo e tamén das persoas coa prestación por incapacidade permanente total que lles concedeu o Instituto Nacional da Seguridade Social. 

A maior parte das persoas que reciben un certificado de incapacidade laboral chegan ao servizo de Emprego coa sensación de que a súa vida laboral rematou. Adoitan ser persoas cunha ampla traxectoria profesional, pero que agora deben enfrontarse a un proceso de busca de traballo nun contexto moi diferente ao que coñecían. Dende COGAMI oriéntaselles para valorar a obtención do certificado de discapacidade e explorar novas oportunidades. A través da formación, poden adaptarse a un novo emprego acorde á súa situación.

Persoas con incapacidade apuntadas en COGAMI

A día de hoxe, a bolsa de emprego de COGAMI conta con 16.935 persoas inscritas das que o 37% ten o certificado de incapacidade permanente total para a profesión habitual. Destas 6.185 persoas con incapacidade laboral, o 72% son homes e o 28% mulleres. Todas están apuntadas na bolsa de emprego porque queren volver ao mercado laboral e, no camiño cara a esta inserción, reciben información, asesoramento, orientación laboral e formación orientada ás demandas do mercado, ademais de participar nas ofertas laborais que xestiona a área Emprego de COGAMI.  

Publicidade    

Preme na imaxe se queres contactar connosco.

Das 6.185 persoas inscritas na base de datos de COGAMI posuidoras do certificado de incapacidade permanente total, 1.025 están apuntadas na oficina de A Coruña, 707 na de Ferrol, 831 en Santiago, 790 en Lugo, 929 en Ourense, 1.024 en Pontevedra e 879 en Vigo. A través do servizo de Emprego de COGAMI poden volver incorporarse no mercado, como xa lograron 1.662 persoas durante o ano pasado, das que 756 tiñan incapacidade laboral.

Campaña COGAMI

COGAMI pon en marcha unha campaña de difusión para informar sobre a incapacidade laboral a través das redes sociais e mediante accións informativas en distintas sedes da Seguridade Social de Galicia. Con esta iniciativa, a entidade quere achegar información ás persoas que obteñen este certificado e que desexan seguir activas laboralmente, xa que en moitos casos descoñécese que poden continuar traballando.