Galicia precisa incrementar as reservas de A- e 0- para responder ás necesidades dos hospitais
- ecosdacomarca
- 10 feb
- 2 Min. de lectura
Ecos da Comarca/Xeral
O conselleiro de Sanidade, Antonio Gómez Caamaño, doou esta mañá sangue na unidade móbil que a Axencia Galega de Doazón de Órganos e Sangue (ADOS) ten instalada diante do Edificio Administrativo do Servizo Galego de Saúde. Mediante este acto, no que estivo acompañado pola directora de ADOS, Marisa López, Gómez Caamaño animou á cidadanía a doar, xa que nestes momentos Galicia precisa incrementar as reservas de A- e 0- para responder ás necesidades dos hospitais.
Os meses de xaneiro e febreiro adoitan coincidir cun aumento de enfermidades como a gripe, que impiden a doazón de xeito temporal, ata a recuperación dos afectados, polo que son datas nas que se pode reducir a base de potenciais doantes.
Non obstante, a necesidade de compoñentes sanguíneos por parte dos hospitais galegos non diminúe, e todos os días do ano precísanse entre 400 e 500 doazóns de sangue. Agora mesmo, ademais, está en marcha a campaña para fomentar a doazón de sangue promovida pola Consellería de Sanidade e a Asociación galega de empresas de envasado de auga mineral natural (AGAMIN), en virtude dun convenio de colaboración asinado a finais do pasado ano co obxecto de contribuír a garantir a cobertura das necesidades hemoterápicas dos centros sanitarios galegos.
Publicidade
En virtude dese acordo, AGAMIN comprométese a poñer á disposición da Axencia Galega de Doazón de Órganos e Sangue un total de 75.000 botellas de auga de 500 ml que están a seren distribuídas entre as persoas doadoras. Así mesmo, a asociación está a distribuír entre os seus asociados información relativa ás actividades promovidas por ADOS.
Para máis información relativa á doazón de sangue ou coñecer a data dos desprazamentos das unidades móbiles, ADOS dispón do sitio web: ados.sergas.gal as redes sociais, e o teléfono gratuíto: 900 100 828.
Comments