Forno ve "escandaloso que Lalín perda 1,13 millóns para a praza de abastos a pesar da prórroga concedida"

“Está claro que Lalín perde oportunidades co PP e isto ten que cambiar, pois se fosen subvencións para festas e orquestras seguro que Crespo se preocuparía un pouco máis” sentencia

Ecos da Comarca/Lalín

A voceira do PSdeG-PSOE de Lalín, Alba Forno, asegura que o Partido Popular "vén de cometer un dos maiores escándalos económicos da historia de Lalín ao perder os 1,13 millóns de euros do Goberno de España para arranxar a parte baixa da praza da abastos". Sinala que o Ministerio de Vivenda vén de abrir o prazo para que os concellos soliciten prórrogas no caso de non dar rematado a tempo as actuacións no prazo outorgado inicialmente ao abeiro do programa PIREP. Non obstante, "Lalín renunciou oficialmente á axuda con anterioridade, motivo polo que estes fondos están perdidos e non se poderán acoller á prórroga".

Así mesmo, explica que "esta renuncia xerou uns intereses de case 60.000 euros que sairán do peto de todos os lalinense". Forno lembra que a única escusa do goberno de Crespo para xustificar a perda de máis dun millón de euros que lle correspondían a Lalín foi a imposibilidade de executar a obra en prazo. “Non obstante, agora o prazo amplíase pero os cartos xa están perdidos”. “Tiveron máis de dous anos para poñer a andar a obra e non fixeron nada, xa non teñen escusa nin xustificación, perderon unha axuda millonaria para un proxecto chamado a revitalizar o noso comercio por pura incompetencia”, asegura.

Publicidade

Preme na imaxe se queres saber máis deste evento.

Para a voceira socialista o desprezo de centos de miles de euros só ten unha explicación: “Estas subvencións ían destinadas ao comercio, un sector que permanece completamente abandonado polo PP. Se fosen subvencións para festas e orquestras seguro que Crespo se preocuparía un pouco máis”. “Volvemos perder diñeiro por unha mala xestión do alcalde e do seu equipo de concelleiros e asesores, que non planifican, improvisan e carecen da capacidade que debe ter un xestor público para dar prioridade aos proxectos”, censurou.

Publicidade

Preme na imaxe se quere contactar connosco.

“Está claro que Lalín perde oportunidades co PP e isto ten que cambiar”, sentenciou.