FEGADACE presenta coa Valedora do Pobo a nova marca común do dano cerebral adquirido

Abordará tamén as súas propostas e demandas para a lexislatura

Laura Moure/Xeral

A Federación Galega de Dano Cerebral (FEGADACE) organiza o vindeiro venres, 21 de xuño, coa compaña e na sede da Valedora do Pobo, un acto no que vai presentar a nova marca común das asociacións de dano cerebral adquirido, e tamén as súas propostas e demandas para a lexislatura iniciada este ano e que abrangue ata 2028.

Un novo nome, Dano Cerebral Galicia, e unha nova identidade na que se unifican todas as entidades de persoas e familias con esta discapacidade, sumando forza para soster unhas demandas que van desde a posta en marcha do Proceso Asistencial Integrado do Dano Cerebral por parte do Servizo Galego de Saúde ata a promoción da vida independente e desinstitucionalización, a accesibilidade universal ou a creación dunha comisión permanente sobre discapacidade no Parlamento de Galicia.

Publicidade

Preme na imaxe para inscribirte e obter máis información.

O acto vai comezar ás 10:30 horas coa intervención da Valedora do Pobo, María Dolores Fernández Galiño. A alta comisionada ten colaborado xa en diferentes ocasións con FEGADACE, acollendo o acto do Día do Dano Cerebral 2022, e estando sempre pendente das necesidades e demandas do colectivo do dano cerebral adquirido.

Publicidade

Preme na imaxe se queres saber máis deste evento.

A continuación falará o presidente de FEGADACE, Luciano Fernández Pintor, introducindo as motivacións e proceso de confluencia do colectivo do dano cerebral a nivel estatal para realizar a transición cara a marca común, e como está previsto que se vaia implantando a nivel local ao longo dos vindeiros meses.

Publicidade

Preme na imaxe se quere contactar connosco.

Por último formularemos as propostas, que dan continuidade ás liñas de traballo abertas por FEGADACE, o conxunto do movemento asociativo da discapacidade e a propia acción institucional das administracións implicadas, que adquiren forma de decálogo que presentará Montserrat Terceiro Rey, membro da Rede de Cidadanía Activa do movemento asociativo do dano cerebral.