Esther Carballal gaña o concurso de carteis do XXXI Festival de Bandas de Música de Galicia de Cruces

Creou un deseño co rostro dunha muller no centro da imaxe, absorta polo poder da música

Laura Moure/Vila de Cruces

O Concello de Vila de Cruces fallou o concurso de carteis para o XXXI Festival de Bandas de Música de Galicia. O cartel gañador foi realizado por Esther Sofía Carballal Feliu, veciña cruceña de 42 anos que, tras vivir en París e Valencia, regresou a súa terra natal, ao fogar dos seus avós.

Esther Carballal explica que a idea da creación artística xurdiu de poñer no centro do deseño o rostro dunha muller, que cos ollos pechados e a cabeza inclinada cara atrás, está absorta na melodía que interpretan uns músicos representados por unhas siluetas

na parte baixa do debuxo. “O cartel representa como a música ten o poder de axudar a evadirnos e facer voar a nosa imaxinación”, indica.

Publicidade

Preme na imaxe para obter máis información do evento.

O certame convocouse en tres categorías, por idades: de 0 a 16 anos, onde o gañador foi Thomas Abraham Moreno Fajardo, que recibirá 75 euros de premio ; de 17 a 64 anos, a gañadora foi Esther Sofía Carballal Feliu, que recibirá 150 euros de premio; e na categoría de maiores de 65 anos, a vencedora foi María Rosa Pampín Bango, que recibirá 75 euros de premio. Ademais, os gañadores recibirán un diploma e, a maiores, a gañadora final do concurso, Esther Carballal, será agasallada co cartel enmarcado que se lle entregará o mesmo día da festa.

Publicidade

Preme na imaxe se queres contactar connosco.

O XXXI Festival de Bandas de Música de Galicia celebrarse o sábado 24 de maio na Praza do Concello, no marco da Festa Gastronómica do Galo de Curral deste 2025. O festival comezará ás 18:00 horas e contará coa participación da Banda de Música Unión Musical de Ponteledesma, a Banda de Música Cultural Teo e a Banda de Música Artística de Merza acompañada pola Coral de San Salvador de Camanzo.