Laura Moure/Agolada
As redes sociais tamén teñen o seu lado positivo e a implicación de tantísima xente fixo que os amigos do alleo acabasen entregando o acordeón exclusivo do grupo de música tradicional Bico da Balouta. O instrumento foi entregado nun bar ao lado da Asociación Amigos do Acordeón da Coruña.
Cabe mencionar que o instrumento fora roubado o pasado domingo dun coche estacionado na zona da rúa de Doctor Fleming na Coruña. E onte, unha semana despois, Bico da Balouta daba a boa nova tamén a través das redes sociais de que aparecera.
Publicidade
"As persoas que o colleron entregárono porque viron que era imposible vendelo xa que a noticia de que fora roubado estaba difundida a nivel nacional e incluso, por toda Europa. É un instrumento exclusivo cun deseño elaborado por min e feito en Italia, e ademais non ten marca, a súa propia marca é o nome de Bico da Balouta grabado", sinala a Ecos da Comarca Luis Corral, o acordeonista deste grupo e presidente da Asociación Amigos do Acordeón da Coruña.
Publicidade
Corral séntese moi feliz e sobre todo, moi agradecido coa implicación de tanta xente. "As redes sociais adoitan usarse para insultarse uns a outros, pero desta volta, demostráronme que tamén serven para axudar e teñen esa parte positiva. Dende este medio quero agradecer a toda a xente que compartiu a publicación, porque gracias a isto devolvérono!", sinala Corral.
Publicidade
Dende ECOS DA COMARCA tamén queremos agradecer a toda a xente, que fostes moita, a que compartistes a nosa noticia da súa desaparición.
NOTICIA RELACIONADA:
Róubanlle o acordeón a Bico da Balouta: https://www.ecosdacomarca.com/post/r%C3%B3ubanlle-o-acorde%C3%B3n-a-bico-da-balouta-de-agolada
Comments