Debido as obras no centro de saúde de Dozón, os veciños serán atendidos no de Lalín

O luns día 30 de outubro será o último día no que os pacientes serán atendidos en Dozón ata o remate da actuación

Laura Moure/Dozón

O inminente comezo das obras de mellora do Centro de Saúde do Castro en Dozón obrigará a desviar temporalmente os pacientes, o médico e a enfermeira ao centro de saúde de Lalín ata que rematen os traballos, previsiblemente a finais do mes de novembro.

Segundo o acordado co Servizo Galego de Saúde (Sergas), o luns día 30 de outubro será o último día no que os pacientes serán atendidos en Dozón ata o remate das obras. É dicir, aqueles que sexan citados a partir do martes 31 de outubro xa serán convocados e atendidos no centro de saúde de Lalín, aínda que manterán o seu médico e enfermeira.

Publicidade

Preme na imaxe para obter máis información!

Tampouco variará o teléfono para solicitar as citas médicas, que seguirá a ser o mesmo que ata agora.

O alcalde, Adolfo Campos Vázquez, lembra que a mellora do centro de saúde era un dos compromisos asumidos na pasada campaña electoral "para que a veciñanza de Dozón e os profesionais que traballan no centro de saúde poidan dispoñer no futuro dun espazo máis moderno, confortable, saudable e accesible".

Publicidade

Preme na imaxe para obter máis información!

O proxecto de mellora, que suporá un investimento superior aos 110.000 euros cofinanciado polo Concello e a Xunta de Galicia, incluirá as seguintes actuacións:

• Instalación dun sistema de climatización con bombas de calor, enerxeticamente eficiente.

• Dotación dun sistema de ventilación que garantirá a renovación permanente do aire interior para que sexa máis saudable, ao tempo que se instalará un sistema de recuperación de calor, con maior eficiencia enerxética.

Publicidade

Preme na imaxe se queres contactar connosco.

•  Adaptación dos espazos á actual normativa de accesibilidade, para facilitar o acceso con padiolas e cadeiras de rodas e para habilitar un aseo adaptado a persoas con mobilidade reducida.

•  Mellora da instalación eléctrica e de iluminación.

• Substitución da carpintaría metálica para mellorar o illamento térmico.

• Pintado de diferentes estancias interiores.