Baixa de 11 a 10 os concellos que non rexistran novos contaxios nos últimos sete días porque Silleda volve ter algún caso
Laura Moure
VENRES 9 ABRIL

Fonte: Ecos da Comarca
Continuamos informando dos casos de coronavirus nos municipios das comarcas de Arzúa, Deza, Terra de Melide e A Ulloa, segundo a información proporcionada hoxe, 9 de abril, polo Servicio Galego de Saúde (Sergas) ou nalgúns casos por fontes municipais, pero hai que ter en conta que o número pode mudar en calquera momento. Descende de 11 a 10 os municipios que non rexistran novos casos nas últimas sete xornadas: Agolada, Dozón, Rodeiro, Santiso, Sobrado dos Monxes, Antas de Ulla, Monterroso, Palas de Rei, Touro e O Pino, porque Silleda volve ter algún contaxio. Os demais concellos sitúanse nunha taxa de entre 1 e 9 casos, agás Lalín que ten 11 casos activos.
Na comarca arzuana, segundo a incidencia acumulada nos últimos sete días, tal e como informa o Sergas, un día máis O Pino e Touro non rexistran novos casos nos últimos sete días, pero hai que recalcar que O Pino ten entre 1 e 9 casos segundo a incidencia acumulada a 14 días. Mentres que Arzúa e Boimorto están nunha escala de entre 1 e 9 contaxios. Todos están no nivel máis baixo de restrincións, agás Boimorto que está no medio. Cabe mencionar que en Boimorto o Sergas levará a cabo un cribado entre a poboación de 31 a 65 anos.
Segundo a incidencia acumulada nos últimos sete días na comarca dezana, Dozón, Rodeiro e Agolada non teñen ningún novo afectado e Lalín ten 11 casos activos. Mentres, Vila de Cruces está nun rango entre 1 e 9 afectados e hoxe súmase a esta escala de novo Silleda. Todos estes municipios están no nivel mínimo de limitacións.
Na comarca Terra de Melide Santiso e Sobrado dos Monxes continúan un día máis sen contabilizar novos casos nos últimos sete días, mentres que Toques e Melide teñen entre 1 e 9 contaxios. Aquí todos os concellos están no nivel máis baixo.
Por último, na comarca da Ulloa Palas de Rei, Antas de Ulla e Monterroso non contabilizan ningún novo afectado unha xornada máis. Todos están no nivel mínimo de limitacións.
Cabe mencionar que hai establecidos catro niveis de limitacións segundo a incidencia acumulada de contaxios de cada concello.
No nivel máximo continúa o concello de Beade. A hostalaría está pechada e non se permiten tampouco as reunións de non convivintes.
No nivel alto están Abegondo, Baiona, Cortegada, O Irixo, Ortigueira, Padrenda, Pazos de Borbén, A Pobra do Brollón, Rábade, Sanxenxo e O Saviñao. A hostalaría pode abrir as terrazas ao 50% e con horario ata ás 21:00 horas.
No nivel medio: Vilardevós, Celanova, O Carballiño, Ribadavia, Xinzo de Limia, Cangas, Moaña, Gondomar, Meis, Bergondo, Boimorto, Carral, A Coruña, Laracha, Arteixo, Betanzos e Camariñas. O peche dos locais hostaleiros é ás nove da noite e permítese o uso ao 30% do interior dos establecementos e no exterior, o 50%.
E por último, no nivel baixo figurarán o resto dos municipios galegos. O horario de restaurantes, bares e cafeterías é ata ás 21:00 horas con 75% de límite nas terrazas e 50% no interior.
Cambios nas limitacións
Pero o comité clínico volveu reunirse este martes, e estableceu algúns cambios na listaxe de municipios afectados polos distintos niveis de limitacións. Así acordou:
Quedarán no nivel máximo de restricións A Pobra do Caramiñal e O Grove.
Ademais, a asamblea de expertos determinou o establecemento do nivel alto de limitacións en seis municipios galegos: A Pobra do Brollón, Rábade, O Irixo, Monterrei, A Illa e Carral.
Así mesmo, quedarán no nivel medio os concellos de Beade, Cortegada, Padrenda, O Carballiño, Boimorto, Sanxenxo, Meis, Cangas, Gondomar, Moaña e Baiona.
E no resto de municipios estarán vixentes as restricións fixadas no nivel medio baixo.
Ademais, a Consellería de Sanidade permitirá as reunións de non conviventes nos domicilios e limitaranse a catro persoas no interior das vivendas e a seis en zonas exteriores. E tamén se poderá viaxar en coche con persoas non conviventes.
Todas estas medidas entrarán en vigor ás 00:00 horas deste venres, 9 de abril.

Fonte: Ecos da Comarca
Comentarios