Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

Datos de Covid nas comarcas de Arzúa, Deza, Terra de Melide e A Ulloa deste venres, 16 de abril

Son 12 os municipios que non rexistran novos contaxios nos últimos sete días, pero tres deles seguen tendo algún afectado segundo a incidencia acumulada a 14 días


Laura Moure

VENRES 16 ABRIL

Fonte: Ecos da Comarca.


Seguimos informando dos casos de coronavirus nos municipios das comarcas de Arzúa, Deza, Terra de Melide e A Ulloa, segundo a información proporcionada hoxe, 16 de abril, polo Servicio Galego de Saúde (Sergas) ou nalgúns casos por fontes municipais, pero hai que ter en conta que o número pode mudar en calquera momento. Suben a 12 os municipios que non rexistran novos casos nas últimas sete xornadas: Agolada, Dozón, Rodeiro, Santiso, Sobrado dos Monxes, Toques, Antas de Ulla, Monterroso, Touro e O Pino, e hoxe súmase a esta listaxe Arzúa e Silleda, mentres que Melide volve rexistrar algún caso neste rango de tempo. Sen embargo, libres de coronavirus só son nove, porque Toques, Silleda e Arzúa seguen tendo algún afectado. Todos os demais concellos sitúanse nunha taxa de entre 1 e 9 casos, agás Lalín que supera a decena.

Na comarca arzuana, segundo a incidencia acumulada nos últimos sete días, tal e como informa o Sergas, un día máis O Pino e Touro non rexistran novos casos nos últimos sete díes. Hoxe tamén figura nesta lista Arzúa porque non tivo ningún novo afectado nestas últimas xornadas, pero sigue tendo algún contaxio porque a incidencia acumulada a 14 días é de entre 1 e 9 enfermos. Mentres Boimorto segue nunha escala de entre 1 e 9 contaxios. Todos están no nivel máis baixo de restrincións, agás Boimorto que desde este luns está no alto.

Segundo a incidencia acumulada nos últimos sete días na comarca dezana, Dozón, Rodeiro e Agolada non teñen ningún novo afectado e en Lalín ascenden de nove a 13 os casos activos. Vila de Cruces están nun rango entre 1 e 9 afectados, concretamente pasa de seis a nove casos activos. E Silleda, segundo a incidencia acumulada a sete días non ten ningún novo contaxio, pero a 14 días segue estando entre 1 e 9. Todos estes municipios están no nivel mínimo de limitacións.

Na comarca Terra de Melide Santiso e Sobrado dos Monxes continúan un día máis sen contabilizar novos casos nos últimos sete días. Tampoco hai novos afectados segundo a incidencia acumulada a sete días en Toques sen embargo, hai que recalcar que este municipio segue tendo algún contaxio e sitúase nun rango de 1 a 9 afectados segundo a incidencia acumulada a 14 días. Mentres, Melide volve estar nun rango de entre 1 e 9 contaxios. Aquí todos os concellos están no nivel máis baixo.

Por último, na comarca da Ulloa Antas de Ulla e Monterroso non contabilizan ningún novo afectado unha xornada máis, mentres que Palas de Rei volve situarse entre 1 e 9 contaxios. Todos están no nivel mínimo de limitacións.

Limitacións por municipios

Cabe mencionar que hai establecidos catro niveis de limitacións segundo a incidencia acumulada de contaxios de cada concello e que este luns entraron en vigor novas limitacións que afectan a algúns municipios. Así a relación de concellos en cada nivel son:

  • No nivel máximo están A Pobra do Caramiñal, O Grove e Carballeda de Valdeorras. A hostalaría está pechada e non se permiten tampouco as reunións de non convivintes.

  • No nivel alto están Boiro, Barreiros, Pobra do Brollón, Monterrei, A Illa, Boimorto, O Irixo e Carral. A hostalaría pode abrir as terrazas ao 50% e con horario ata ás 21:00 horas.

  • No nivel medio: os concellos de Rábade, Ribadumia, Soutomaior, Vilaboa, Vilanova, As Neves, Noia, Sanxenxo, Meis, Baiona, Gondomar, Carballiño, Cortegada e Padrenda. O peche dos locais hostaleiros é ás nove da noite e permítese o uso ao 30% do interior dos establecementos e no exterior, o 50%.

  • E por último, no nivel medio-baixo figuran o resto dos municipios galegos. O horario de restaurantes, bares e cafeterías é ata ás 21:00 horas con 75% de límite nas terrazas e 50% no interior.

Ademais, a Consellería de Sanidade permite desde o pasado sábado as reunións de non conviventes nos domicilios e limítase a catro persoas no interior das vivendas e a seis en zonas exteriores. E tamén se pode viaxar en coche con persoas non conviventes. Mentres, a mobilidade permítese en todos os municipios, agás nos que están no nivel máximo nos que non se pode entrar nin saír de cada un sen unha causa xustificada.

Novos cambios a partir de hoxe

O Comité clínico que asesora á Xunta de Galicia na xestión da pandemia acordou este martes manter o nivel máximo de restricións para os municipios de Carballeda de Valdeorras, A Pobra do Caramiñal e O Grove.


Ademais, a asamblea de expertos determinou o establecemento do nivel alto de limitacións en dez concellos: Monterrei, Cortegada, Padrenda, O Barco de Valdeorras, Rubiá, Barreiros, Carral, Boimorto, Boiro e A Illa de Arousa.


Así mesmo, quedarán no nivel medio os municipios de O Irixo, Trabada, Meira, A Pobra do Brollón, Muxía, Cambre, Ortigueira, Ribeira, Meis, Ribadumia, Sanxenxo, Soutomaior, Vilanova de Arousa, As Neves, Gondomar, Vilaboa, Marín e Meaño.


No resto dos concellos galegos estarán vixentes as restrincións fixadas no nivel medio- baixo.

Todas estas medidas entrarán en vigor ás 00:00 horas de hoxe, venres 16 de abril.

Toque de queda e ampliación horario restaurantes

O presidente da Xunta de Galicia, Alberto Núñez Feijóo, anunciou este mércores outros cambios que entrarán en vigor a partir deste venres tamén.

  • O toque de queda pasa a ser ás 23:00 horas.

  • Os bares e cafeterías manterán o horario de apertura ata as 21:00 horas e os restaurantes poderán abrir ata as 23:00 horas (terá que ser con reserva previa, deberán manter rexistro de clientes e contar con medidores de CO2 do aire).

  • Nas residencias da terceira idade: Sen límites de visitas, polo que poderán visitarlos calquera familiar, pero sempre con cita previa. E os maiores poderán saír á rúa tres veces por semana cunha duración de catro horas cada vez.

  • Galicia seguirá pechada perimetralmente.

Fonte: Ecos da Comarca. *


*Este gráfico fai referencia aos datos de contaxios segundo a incidencia acumulada a sete días, polo que hai concellos que a 14 días seguen tendo algún afectado como explicamos no texto.

221 vistas0 comentarios
IRS.jpg

ESPAZO DISPOÑIBLE PARA ANUNCIARSE