Dúas persoas detidas e outras dúas investigadas como presuntos autores dunha ola de roubos en Melide

Ecos da Comarca/Melide

A Garda Civil, no marco da Operación Drujbe, levou a cabo un importante golpe contra a ola de roubos que afectou á localidade de Melide a principios deste ano. Dúas persoas foron detidas e outras dúas están a ser investigadas como presuntas responsables destes delitos, que xeraron unha grave alarma social na localidade.

O Cuartel da Garda Civil de Melide. Autor: Ecos da Comarca.

A investigación, desenvolta por efectivos do Posto de Melide, Boimorto e Equipo ROCA de Santiago de Compostela, centrouse nun individuo de nacionalidade estranxeira e residente en Melide, con antecedentes por feitos similares. Presúmese que este individuo, especializado no roubo de maquinaria e ferramentas en domicilios e vehículos, foi o cerebro detrás da serie de roubos. En total, esclarecéronse cinco roubos con forza en vivendas habitadas, seis furtos no interior de vivendas, un delito de furto en interior de vehículo e tres delitos de receptación.

Publicidade

Preme na imaxe para obter máis información.

Ademais, como resultado de diversas intervencións durante a investigación, logrouse a recuperación dunha cantidade considerable de efectos subtraídos, cun valor estimado de 12.000 euros, os cales foron devoltos aos seus lexítimos propietarios. A investigación tamén revelou a implicación de polo menos catro veciños de Melide na compra de ferramentas e maquinaria ao principal sospeitoso, sabendo que estes obxectos eran roubados. Estas persoas obtiñan os artigos a prezos moi vantaxosos, significativamente por baixo do seu valor real. O modus operandi do principal sospeitoso implicaba o acceso a garaxes, sotos e anexos de vivendas unifamiliares para subtraer principalmente pequena maquinaria e ferramentas.

Publicidade

Preme na imaxe se queres contactar connosco.

Tamén se descubriu que accedía a vehículos estacionados na vía pública que contiñan maquinaria forestal ou de construción. As dilixencias e os detidos/investigados foron postos ao dispor do Xulgado de Instrución nº1 de Arzúa. A operación continúa aberta, polo que non se descartan novas detencións.