Camiñas: "En tan só 2 anos e 3 meses de goberno, xa se investiu máis de 2 millóns de euros en Rodeiro"

"Unha cifra moi superior á que destinou o PP en tres mandatos completos baixo a dirección de Luís López e Cati Somoza", recalca o alcalde socialista de Camba

Ecos da Comarca/Rodeiro

O Concello de Rodeiro lembra que, "en tan só dous anos e tres meses de goberno, xa se teñen investido máis de 2 millóns de euros en melloras para o municipio, con investimentos que lle corresponden por existir un concello da Deputación, Xunta e fondos propios, unha cifra moi superior á que destinou o Partido Popular en tres mandatos completos baixo a dirección de Luís López e Cati Somoza", tal e como recalca o alcalde socialista, José Luis Camiñas.

José Luis Camiñas, alcalde de Rodeiro.

Esta diferenza, apunta, "deixa en evidencia o abandono e desfeita herdada tras doce anos de desgoberno do PP, nos que o rural quedou practicamente á marxe das inversións. Pola contra, o actual goberno puxo o foco desde o primeiro día en recuperar esa débeda histórica coas parroquias e cos veciños, atendendo ás necesidades reais de cada lugar".

 Publicidade

Preme na imaxe para obter máis información.

Fronte á moción presentada polo PP solicitando a reparación de 18 viais, o alcalde recorda que "a prioridade non pode ser unha listaxe illada, senón un plan serio, rigoroso e sostido no tempo, que multiplique por tres ese número de actuacións, como xa se vén facendo".

Publicidade

Preme na imaxe se queres contactar connosco.

“O noso compromiso é claro: seguir investindo no rural, mellorar as infraestruturas en todo o concello e traballar con planificación, non con parches nin mocións de escaparate. A veciñanza de Rodeiro sabe que os feitos falan máis ca as palabras, e os feitos son máis de dous millóns de euros investidos en pouco máis de dous anos, fronte ao abandono dos 12 anteriores”, subliña o rexedor.