top of page

BNG, AxA e PSOE gobernarán en coalición en Arzúa “poñendo por diante o interese xeral da veciñanza"

As tres formacións veñen de asinar o acordo de goberno co que este Concello “contará cun goberno de progreso, estable e forte para os vindeiros catro anos”


Laura Moure/Arzúa

O BNG, Alternativa por Arzúa e o PSOE veñen de facer público os detalles do acordo de goberno acadado entre as tres organizacións políticas para a composición do goberno local do Concello de Arzúa durante o mandato que vén de comezar. “Trátase dun acordo estabelecido sobre os principios de igualdade, lealdade, honestidade, colaboración e cooperación institucional”, sinala o alcalde de Arzúa, o nacionalista Xoán Xesús Carril.

Os grupos que componen a coalición explican dar, así, “resposta ao mandato da veciñanza nas urnas o pasado 28 de maio, ao non darlle a ningunha forza política a maioría absoluta”. Ao fío desto, sosteñen que “é un acordo froito do diálogo para darlle a Arzúa un goberno de progreso estable e forte, defensor absoluto do interese público, da xestións limpa, transparente e participativa, e do trato en igualdade a todas as veciñas e veciños do noso Concello”.


Publicidade

Distribución de áreas

En base ao acordo feito público, corresponde ao BNG, ademais da Alcaldía durante os próximos catro anos, as concellarías de: Urbanismo, Obras e Servizos, Medio Ambiente e Benestar animal, Deportes, Igualdade, Xuventude e Infancia, Normalización Lingüística e Patrimonio, Participación Veciñal e Transparencia, Persoal e réxime interno e Facenda e Contratación.


Publicidade

Pola súa banda, Alternativa por Arzúa asume as concellarías de: Cultura e Educación, Servizos Sociais e Terceira Idade e Atención ás Parroquias.

Por último, será a edil do PSOE, Begoña Balado, a que detentará as concellarías de: Turismo, Promoción económica, comercio e consumo, e Acción Urbana.

Así mesmo, Alternativa por Arzúa obstentará a Primeira Tenencia de Alcaldía e o PSOE a segunda.

Os portavoces do BNG, Xoán Xesús Carril, de AxA, José Luís García, e a portavoz do PSOE, Begoña Balado, asinaron este documento en representación das súas formacións políticas e manifestaron a súa vontade de “colaboración honesta, leal, transparente e comprometida co interese xeral da veciñanza de Arzúa. Unha colaboración que permitirá o comezo dun tempo novo no noso Concello, cun goberno municipal representado de maneira proporcional ao mandato que a veciñanza arzuá deu nas urnas, e que terá como piares básicos a unidade, a lealdade e a confianza mutu entre as forzas que o compoñen”, concluíron.







0 comentarios

Comentarios


IRS.gif
Copia de ¡TU Anuncio!.gif
Ecos_da_Comarca_neg.png
bottom of page