AVA propón abrir diálogo cos veciños para ver a posibilidade de impulsar en Antas permutas de terra
Fala dunha iniciativa que xa se está levando a cabo no concello veciño de Friol
Laura Moure/Antas de Ulla
A Alternativa Veciñal de Antas de Ulla levará ao vindeiro pleno unha moción na que propón abrir diálogo con agrupacións veciñais, gandeiros/as, agricultores/as deste municipio concello e diferentes axentes sociais para analizar a pertinencia ou non de impulsar un proxecto de permutas de terra similar ao que xa se está levando a cabo no veciño concello de Friol.
"Fai xa anos que o veciño concello de Friol está aplicando un modelo que permite o acceso á terra para aqueles agricultores e gandeiros que precisan de maior concentración de terreo para que as súas explotacións sexan rendibles. É un modelo que se demostra aporta solución neste sector e que moitos concellos están a replicar: Castro de Rei, Outeiro de Rei, Guntín… Trátase de permutas de parcelas que nin sequera terían porque supor un contrato de compra- venta (senón cesión de uso) aínda que no caso de Friol si se produce a reestruturación da propiedade da terra. Como afirma o seu alcalde nalgúns medios de comunicación: “É coma unha concentración parcelaria exprés e moito máis económica”", indica AVA.
Ademais, apunta que en Friol colabora o GDR (Grupo de Desenvolvemento Local) que aporta parte do gasto para que os interesados non teñan que sufragar os custos tan elevados que lles suporían estes trámites. "Na Pastoriza, porén, o concello actúa máis ben como xestor e facilitador do arrendamento de predios que os propietarios non usan para facilitalos a interesados que precisan aumentar a extensión de terreo próximo entre si
para as súas explotacións. É preciso, non obstante o anterior, contactar coa veciñanza para comprobar se no caso do noso concello poderían ser modelos que ofrezan interese".
E incide que neste caso, "o concello actúa como intermediario facilitando a burocracia dos trámites en colaboración co GDR". Por todos este motivos, esta formación política propón este acordo para debatir na vindeira sesión plenaria.
