As temperaturas de agosto de 2025 na estación de Mouriscade (Lalín)

Artigo do xeógrafo lalinense Antonio Presas

Antonio Presas, xeógrafo lalinense

En ECOS DA COMARCA compartimos este artigo autoría de Antonio Presas, xeógrafo lalinense, sobre as temperaturas rexistradas na estación de Mouriscade, Lalín no pasado mes de agosto.

AS TEMPERATURAS DE AGOSTO 2025 NA ESTACIÓN DE MOURISCADE (LALÍN)

"Todo parece indicar que a temperatura media do mes de agosto, deste ano 2025, foi a máis elevada nos últimos anos, pero os rexistros térmicos da estación meteorolóxica de Mouriscade aclaran a realidade. A estación de Mouriscade, controlada na actualidade por Meteogalicia, conta cun extenso rexistro continuo desde 1982, é decir, temos datos de temperaturas dos últimos 43 anos. Un rexistro de tal amplitude permite observar a evolución das temperaturas máximas, medias e mínimas, habidas diariamente, desde a súa posta en funcionamento en 1982 polo Centro de Investigacións Forestais de Lourizán.

Publicidade

Preme na imaxe para obter máis información do evento.

1- Temperaturas máximas absolutas mensuais (agosto)

O rexistro das temperaturas máximas absolutas habidas no mes de agosto sempre estiveron por debaixo dos 40º C, un valor que se ten producido e superado noutras localidades de Galicia, especialmente no val do Miño-Sil.

En Mouriscade a temperatura absoluta máxima no mes agosto tivo lugar no ano 1990 con 38,5ºC. En agosto deste ano 2025 acadouse un valor de 37,05ºC, que a sitúan no posto número catro (2023 con 38,2ºC, 2003 con 38ºC. O valor máis baixo das máximas absolutas de agosto tivo lugar en 1986 con 28ºC. (ver gráfico)

As temperaturas máximas absolutas corresponden a un valor extremo.

2- Media das temperaturas máximas absolutas diarias (agosto)

A media mensual das temperaturas máximas diarias habidas no mes de agosto durante os últimos 40 anos, un valor relativamente interesante, sitúa a este mes como o segundo rexistro máis elevado, con 29,19ºC, superado polo mes de agosto de 1998 con 29,4ºC. A terceira posición corresponde a agosto de 2003 con 28,8ºC. Foi no ano 1983, cando se produciu a temperatura medía das máximas absolutas máis baixa da serie cun valor de 22,3ºC (ver gráfico).

3- Temperatura media.

As temperaturas medias mensuais é un dos valores máis representativos e estables en calquera seríe climática e se aplicamos ese valor a todos os meses serve de indicador das características dun clima. En Mouriscade a media de agosto máis elevada tivo lugar no ano 1998 con 20,4ºC. Neste último mes de agosto ese valor foi de 19,96ºC, o cuarto lugar da serie (1991 e 2003 con 20,2ºC).

A evolución das temperaturas medias ao longo dos meses do ano (ver gráfico)

sinala, claramente, que o mes de xuño foi un mes extremadamente caluroso e o mes de agosto de este ano, moi similar ao de 2024, tamén foi moi superior ao promedio, uns dous graos centígrados por encima da media climática.

Publicidade

Preme na imaxe se queres contactar connosco.

En resume, durante estes últimos anos estamos a percibir de forma sensorial, a existencia duns meses de verán, que de forma case continua, presentan uns valores bastante superiores ao promedio climático actual, pero se isto o puideramos comparar con rexistros (que non existen no caso de Mouriscade) de comezos do século pasado, estariamos ante unha situación sorprendentemente anómala, por causa do cambio climático".

Antonio Presas, xeógrafo lalinense.