As actividades de Normalización Lingüística sobre Delgado Gurriarán chegan hoxe ao colexio de Toques
Laura Moure/Toques
As actividades programadas pola área de Normalización Lingüística da Deputación da Coruña arredor da figura de Florencio Gurriarán, a quen se lle dedicou este ano o Día das Letras Galegas, volven ás escolas infantís e de primaria coruñesas e aos centros educativos de asistencia a menores de titularidade provincial. Entre eles estará nas comarcas, hoxe mesmo no colexio de Toques. Cabe mencionar que este espectáculo tamén recorreu hai meses distintos concellos da comarca de Deza.
Para este mes de outubro están programadas dez sesións de contacontos a cargo de Polo Correo do Vento, que achegará á cativada a figura e a o obra do autor, homenaxeado este ano co Día das Letras Galegas. Ademais, os nenos e as nenas recibirán de agasallo "De Valdeorras a México. Terra a Nosa! Pequena biografía de Florencio Delgado Gurriarán", proxecto conxunto de Lela Edicións e Polo Correo do Vento, con ilustracións de Tania Solla.
"Con estas actividades", explica a deputada María Muíño, "a área de Normalización Lingüística quere achegar ao público máis novo a biografía e fragmentos do traballo poético do autor de Valdeorras, a percorrer os seus espazos vitais, as súas inquedanzas culturais e as perspectivas políticas que o acompañaron". "Sempre procuramos", engadiu, "que a nosa programación, sobre todo a máis didáctica, se prolongue todo o ano e non se centre só nas datas sinaladas, caso do Día das Letras".
Axenda • 04/10 (18 horas), na Biblioteca Provincial Coruña • 06/10 (13:30 horas), en Cerdido • 11/10 (93:0 horas) EEI de Coirós • 11/10 (13:30 horas), no CEIP Plurilingüe de Toques • 13/10 (10:30 horas), no CEIP de Présaras, en Vilasantar • 13/10 (13:30), no CEIP O Marbán, en Somozas • 14/10 (13 horas), no CEIP Praia de Quenxe, en Corcubión • 21 /10 (16:30 horas), no Fogar Infantil de Ferrol
Quedan por confirmar o horario e o lugar onde se celebrarán as citas de Aranga e do Colexio Fogar da Coruña.
