Arzúa dá luz verde a melloras viarias e modificacións en proxectos de saneamento e urbanización
- ecosdacomarca
- 11 sept 2025
- 2 min de lectura
Investirá máis de 450.000 euros en melloras viarias, saneamento e urbanización, cunha parte importante do orzamento adicada ás parroquias
Ecos da Comarca/Arzúa
O Concello de Arzúa celebrou onte un pleno extraordinario no que se aprobaron diferentes actuacións de investimento enmarcadas no Plan Único (POS+) da Deputación da Coruña, así como modificacións en proxectos en execución.
Melloras viarias nas parroquias
A Corporación municipal deu luz verde ao POS+ Adicional 2/2025, que recolle un conxunto de obras de mellora de vías en distintas parroquias:
Viario a Igrexa–Seixas (Dodro)
Viario en A Pena (Castañeda)
Viario a Preguntoño (Burres)
Viario en A Xunqueira (Maroxo)
Viario entre a Igrexa–A Pena (Maroxo)
Viario en Lema de Arriba (Lema)
Viario en Guldrís (Rendal)
Ampliación da pista en Lema de Abaixo (Lema)
Pola súa parte, no núcleo urbano aprobouse a renovación dos pavimentos na Rúa Piñeiral (Arzúa). Estas obras compleméntanse coas xa aprobadas anteriormente no marco do mesmo plan: mellora vial de Sesar a Soutullo (San Martiño) , pista do Cruce Samil ata o límite (Santo Estevo), pista de Requeixo–Igrexa da Mella (Mella) e pavimento vial de Fonxe a Agra de Vales (Santa María).
Proxecto de saneamento
O pleno aprobou tamén o proxecto modificado do saneamento no Camiño da Empegada, que incorpora un novo tramo de beirarrúa co obxectivo de mellorar o acceso para persoas con discapacidade e mobilidade reducida.
Proxecto de urbanización
Outro dos acordos foi a aprobación do proxecto modificado de urbanización da Fraga do Rei dende a Avenida de Lugo. Debido a cuestións técnicas, o sistema inicial de soterrado de colectores foi substituído por contedores de superficie, protexidos con valados. O proxecto tamén recolle unha cesión de terreos dun veciño e outras actuacións que permiten mellorar a planificación inicial, optimizando tanto a integración urbanística como a funcionalidade do espazo.
Publicidade
Seguimento do pleno
O pleno extraordinario emitíuse en directo a través das redes sociais de Radio Arzúa e está e pode verse íntegro a través da seguinte ligazón:
Comentarios