Arzúa adxudica as obras de rehabilitación da ´Casa do Peregrino´ no lugar do Río Vello
O obxectivo desta actuación, por importe superior aos 70.000 euros, é volver a poñer o edificio en uso
Laura Moure/Arzúa
O goberno municipal do concello de Arzúa, conformado por Alternativa por Arzúa e PSdG-PSOE, levou á aprobación da Xunta de Goberno, celebrada o pasado venres, a adxudicación das obras de reparación e mantemento da coñecida como “Casa do Peregrino”, situada no lugar do Río Vello. A actuación foi adxudicada á empresa Groma Obras, S.L. por un importe de licitación que ascende a 70.645,20 euros e conta cun prazo de execución de seis meses.
Na actualidade, a coñecida como CASA DO PEREGRINO, situada no Río Vello, atópase sen uso algún presentando un estado de descoido importante, tras permanecer varios anos sen ser obxecto de mantemento e reparación algunha, tal e como indica o Concello. A construción segundo a ficha catastral data do ano 1.980, aínda que segundo as pescudas efectuadas a súa antigüidade é superior. Nalgún tempo esta construción albergou a escola municipal de música ata que anos despois foi desprazada para a Casa de Cultura, pasando esta a funcionar como albergue municipal. Debido ao seu mal estado deixa de funcionar como albergue, permanecendo pechado ata o día de hoxe.
Begoña Balado, concelleira de Obras, explicaba este luns que a pretensión do goberno municipal “é agora a súa recuperación, efectuando as obras de reparación e mantemento consideradas necesarias e imprescindibles para poñela en uso e evitar así que continúe o seu deterioro”.
O proxecto
As actuacións recollidas na Memoria Valorada REPARACIÓN E MANTEMENTO DA ANTIGA “CASA DO PEREGRINO” e cuxa adxudicación foi aprobada na Xunta de Goberno do pasado día 30 de setembro, corresponden fundamentalmente con obras de reparación e mantemento do inmoble para evitar o seu continuo deterioro.
Serán necesarias obras de reparación fundamentalmente a nivel de cubertas, carpinterías exteriores e interiores e acabados interiores (redistribución de aseos), facendo tamén as tarefas necesarias de limpeza e posterior pintado de fachadas. Nos traballos que se proxectan non se pretende modificar o volume existente, permanecendo tal e como está o
volume e os ocos de fachadas. Exteriormente preténdese executar traballos e saneamento e drenaxe e unha rampla de acceso co fin de que este local conte con accesibilidade.
Balado adianta que “estamos estudando o uso que se lle pode dar ao inmoble unha vez se rehabilite, definirase en función das necesidades que se observen”.
