Ariadna Fernández, deputada do BNG: Carta aberta ao PP de Rodeiro

Ariadna Fernández/Rodeiro

Ariadna Fernández, deputada do BNG no Parlamento de Galicia escribe a seguinte carta aberta dirixida ao PP de Rodeiro.

CARTA ABERTA

Adiadna Fernández.

Carta aberta ao PP de Rodeiro.

"Quizais non é doado, no estilo político que agora predomina e no que a dereita se sinte moi cómoda, saber para que estamos aquí. Cando digo aquí refírome a traballar en política, a exercer o noso cargo a calquera nivel coa maior responsabilidade posible, sen andar a varrer para un, varrendo para a casa de todos os veciños e veciñas por igual. Porque se trata diso, ou diso é do que eu penso que vai o asunto, aínda que para determinados grupos políticos ou representantes destes, non sexa doado de comprender que esta profesión “é a ferramenta para mellorar” en xeral, non só uns poucos escollidos.

Sorpréndome decote cando, a través dunha organización política coma o BNG, solicitamos medidas que melloran a vida da xente e o resto das formacións parecen revolverse, non estar contentas, discrepar. Mais non se contrarían porque a solicitude que se fai sexa boa ou mala, van á contra sistematicamente porque a medida proposta non é súa, porque son o partido do goberno do país e non son capaces de traer melloras para o seu concello, ou porque simplemente o lugar que ocupan é a oposición, sen entender que deben construír e non destruír.

En Rodeiro sucede así. O PP, a pesares de saber que o financiamento do Punto de

Atención á Infancia lle fai un burato aos orzamentos ao seu concello e lle resta capacidade económica ao goberno para atender a outras necesidades, critican que o

BNG solicite en sede Parlamentar que a Xunta de Galiza se faga cargo economicamente

do servizo de atención ás crianzas.

O goberno galego aportou neste curso para esa fin pouco máis de 20.000 euros, segundo os seus datos oficiais, que non chegan a cubrir o 20% do financiamento que precisa o punto de atención á infancia de Rodeiro para funcionar e ofrecer a tan estimada

conciliación familiar. A atención ás crianzas 0-3 que a Xunta de Galiza vende coma gratuíta e universal, ofértaa neste caso o concello, coma outros moitos espallados polo país e afogados en gastos. O que si vixían con ansia dende a Consellería de Política Social, é que o cartel da suposta gratuidade da Xunta luza ben á vista na porta das instalacións do PAI. Eles convidan dende Santiago e paga o concello dende Rodeiro ou dende Agolada.

Quizais houbo moitos que tomaron ao pé da letra o “cuanto peor, mejor” do seu M punto Rajoy, esa sería a única forma de explicar que o PP de Rodeiro non sexa capaz de ver que, se a Xunta de Galiza financia a gratuidade, o diñeiro que agora se está usando para o PAI pode repercutir positivamente nos veciños. Desautorizar a unha deputada adscrita á súa comarca, na que naceu e vive, de levar iniciativas beneficiosas para un concello pertencente a esta, é unha forma ruín de facer oposición, por non determe a analizar se os membros do PP de Rodeiro que ostentaron o goberno durante anos tiñan a súa residencia alí, ou se realmente a tutela era dende Santiago como eles mesmos critican. Lamento ben que non consideren que a información que manexo é veraz, cando os seus propios compañeiros ma facilitaron no Parlamento

Galego e a contrastei coa militancia de Rodeiro, que sigue estando presente, aínda que non sexa para gusto de todos, ao igual que con familias usuarias.

Publicidade

Preme na imaxe se queres contactar connosco.

O traballo político faise en beneficio de todas e todos os veciños, non só da militancia propia, coma parecen ter asumido os populares de Rodeiro. Sinto moito que, podendo solicitar eles esta medida aos seus compañeiros que gobernan a Xunta e cos que imaxino teñen liña directa, non o fagan e lles estorbe quen o fai, que o único que pretende é mellorar a situación dunha comarca totalmente esquecida polo goberno galego, que sofre unha crise demográfica da que son responsables con desleixos coma este que estamos a tratar, onde o abandono é evidente.

Debemos traballar para desenganar aos populares de Rodeiro e facerlles ver que o

“cuanto peor mejor” foi un erro de colocación das palabras do que foi presidente do goberno do estado español, para que deixen ese dogma de lado e non o tomen en serio, para que se adiquen a traballar para ir cara adiante e non poñan os pés de estribo cando o BNG avanza no bo camiño.

Ariadna Fernández, deputada do BNG no Parlamento Galego.