Antas de Ulla acollerá este sábado unha mesa redonda sobre os xurros e a produción de biogás

Participarán persoas expertas e dos sindicatos agrarios

Laura Moure/Antas de Ulla

A Casa da Cultura de Antas de Ulla acollerá mañá -15 de febreiro, ás 16:00 horas – unha mesa redonda en relación cos xurros e a produción de biogás, organizada por Adega coa colaboración da área de Rural da Vicepresidencia da Deputación de Lugo.

A xornada contará coa participación do enxeñeiro agrónomo e investigador no Centro de Investigacións Agrarias de Mabegondo Xoán Castro e de representantes dos sindicatos e asociacións agrogandeiras  -Sindicato Labrego Galego, Fruga, Unións Agrarias, Agromuralla e a asociación Gandeiras e gandeiros galegos Elas Eles -, que achegarán información sobre o proceso produtivo nas plantas de biogás e  sobre o seu impacto no territorio, tras a presentación por parte da empresa CCC Energo dun proxecto para construír unha planta de biogás no municipio.

O deputado de Rural Daniel García valorou a iniciativa que “atende unha demanda emerxente de información por parte do sector gandeiro da Ulloa  en relación co modelo enerxético vinculado á xestión de residuos” e defendeu “modelos produtivos sostibles, que respecten o medio, a herdanza da tradición agraria e a xestión do territorio”.

Publicidade

Preme na imaxe para obter máis información do evento.

O vogal de Adega Daniel Vispo tamén puxo o foco na participación das asociacións e sindicatos agrogandeiros. “Preguntámonos se os xurros son un problema ambiental e se as plantas de biogás son a solución, e buscamos a participación do sector gandeiro nese debate, porque entendemos que as ganderías son as primeiras interesadas en defender o territorio”.

A presentación da xornada contou tamén coa participación de Sonia Mareque, representante do recén constituído colectivo veciñal “Biogás en Antas Non”, que expuxo a preocupación xerada entre a veciñanza polo proxecto presentado pola empresa CCC Energo o pasado mes de decembro e destacou a necesidade “de información e formación para que a veciñanza, e particularmente as gandeiras e gandeiros, entendan mellor en que consiste a produción de biogás e que conlevaría a chegada dunha planta destas características a Antas”.

Publicidade    

Preme na imaxe se queres contactar connosco.

Participantes no coloquio:

• Xoán Castro | Investigador do CIAM

• Xulio Fernández | Coordinador sector lácteo do Sindicato Labrego Galego

• Elías Somoza Regueiro | Responsable da área de gandería da FRUGA

• Xulio Fernández | Coordinador sector lácteo do Sindicato Labrego Galego

• Jacobo Feijóo Lamas | Técnico de Unións Agrarias

• José Luis Pérez Barreiro | Presidente de Agromuralla

• Adrián Riádigos | Presidente de Gandeiras e gandeiros galegos Elas-Eles

• Modera:Sonia Mareque Alonso | Tecnóloga de alimentos