Amigos da Empanada de Bandeira incorpora a Lucía González e Bárbara Cuiña á súa directiva
Laura Moure/Silleda
Bárbara Salgueiro Cuiña e Lucía González Souto son as novas fichaxes da asociación organizadora da Festa da Empanada, logrando a directiva un equipo de 26 persoas, distribuídas en diversas áreas de traballo. Esta adhesión, que busca fortalecer a área económica do grupo, é valorada de xeito moi positivo polo presidente Andrés Seoane, que se mostra sorprendido ante unha situación inédita: “nos últimos anos, existían grandes dificultades para xuntar unha directiva, e agora é propia xente a que se ofrece para sumarse á formación, polo que só teño palabras de agradecemento”.
Nas vindeiras semanas, a Asociación Amigos da Empanada da Bandeira comezará a busca de colaboradores e patrocinadores do seu libro de negocios, que este ano será realizado en formato dixital para facilitar a súa difusión e reducir os custos.
Por outra parte, o gran número de participantes, permitirá desenvolver unha axenda cultural e gastronómica que se estenderá máis alá dos meses de verán, ofertando diversas actividades ao longo do ano.
