Amigos da Empanada da Bandeira anuncia o prazo para o aluguer de mesas da comida e cea de peñas

O período de reserva será distinto en función de se esta de realiza de xeito presencial ou telemático

Laura Moure/Silleda

O equipo de persoas voluntarias da Asociación Amigos da Empanada anunciou o prazo para a reserva de mesas da tradicional Festa da Empanada, que celebra a súa 48 edición o vindeiro 24 de agosto na localidade da Bandeira. Tras o éxito logrado o ano pasado, a cita gastronómica por excelencia do Concello de Silleda, apostará novamente polo formato de comida e cea, podendo as persoas asistentes gozar do evento en ambos horarios e polo mesmo prezo no que respecta ao aluguer de mesas. 

O período de reserva de mesas será distinto en función de se esta de realiza de xeito presencial ou telemático:

• Polo que respecta ao prazo de reserva de xeito presencial, este arrincará o luns 12 de agosto e estenderase ata o domingo 18 de agosto, ambas xornadas incluídas, cun horario de 19:00 a 21:30 horas durante a semana e de 12:00 a 14:00 horas o fin de semana. As solicitudes efectuaranse no Centro Cultural Vista Alegre e os métodos de pago son en efectivo ou transferencia bancaria. 

• Así mesmo, poderase facer a reserva a través de WhatsApp contactando ao teléfono da asociación no 621 08 71 17 e podendo abonar a cantidade a través dunha transferencia bancaria ou bizum seguindo as instrucións indicadas pola organización na plataforma de mensaxería instantánea. O prazo de reserva de forma online estará aberto do luns 5 ao domingo 18 de agosto, ambos incluídos.

• No caso das reservas de espazos para carpas privadas, estas deberán realizarse de xeito obrigatorio de modo presencial no Centro Cultural Vista Alegre. 

Publicidade

Preme na imaxe para obter máis información.

O prezo das mesas será o mesmo que na última edición, é dicir, 35 euros por mesa, dando cada unha delas servizo a un total de 10 persoas. No caso das persoas asociadas, estas terán descontos nas mesas, tendo un custo de 20 euros as dúas primeiras e de 25 a partir da terceira.

É importante recordar que son as peñas as que deberán levar todo o necesario xa que a organización só facilita o espazo e a mesa e ofrece servizos como baños, luz ou auga en diferentes puntos da carballeira da Pomba, na que se espera reunir a centos de peñas, é dicir, máis de 10.000 persoas. Tamén é preciso indicar que o prezo da mesa será o mesmo tanto se se decide comer, cear ou ambas opcións.

Publicidade

Preme na imaxe para contactar con nós.

A directiva roga a toda a veciñanza e persoas visitantes ao evento que cumpran meticulosamente co horario establecido xa que as persoas voluntarias realizan múltiples tarefas ademais das reservas. Ademais, a Festa da Empanada contará con pulpería oficial para todas aquelas persoas que non desexen reservar mesa ou que queden sen a mesma por falta de espazo. 

Máis información desta festa no enlace: https://www.festadaempanada.org/