Alba Forno pide explicacións ante a confusión xerada co lanzamento do Bono Comercio en Lalín

Os socialistas preguntarán no pleno por que xa se poden descargar bonos sen que exista información pública nin comercios adheridos visibles

Ecos da Comarca/Lalín

A voceira municipal socialista, Alba Forno, pídelle explicacións ao goberno local ante a confusión xerada arredor da posta en marcha do Bono Comercio de Lalín, despois de comprobar que xa é posible descargar os bonos a través da plataforma habilitada na internet, ou das aplicacións para móbiles, sen que exista, polo momento, información oficial clara sobre o funcionamento da campaña.

Así, sinala que que xa están activas unha web específica e as APPs a través das que calquera persoa pode rexistrarse e descargar un bono desconto en formato QR. Porén, ao acceder ao apartado de comercios adheridos non figura ningún establecemento dispoñible, o que está provocando dúbidas entre veciños e veciñas que descoñecen se os bonos xa poden utilizarse ou non.

Forno sinala que varias persoas trasladaron xa a súa sorpresa tras descargar os bonos e comprobar ademais que estes aparecen cunha data de caducidade moi próxima, sen que exista comunicación pública oficial do Concello nin información sobre cando comezará realmente a campaña.

A voceira socialista sostén que probablemente se trate dun problema de coordinación ou dun lanzamento anticipado da plataforma antes de completar todo o proceso administrativo e de adhesión dos negocios, pero entende que o Concello debe aclarar de inmediato a situación para evitar máis confusión entre a cidadanía e os propios comerciantes.

 PUBLICIDADE

Se queres obter máis información do evento preme na imaxe.

Alba Forno lembra ademais que esta iniciativa se puxo en marcha grazas á proposta levada a cabo polo PSdeG-PSOE de Lalín e aprobada polo Pleno, tras anos defendendo a creación dun Bono Comercio en Lalín.

“Nós sempre defendemos esta iniciativa porque cremos que pode ser unha ferramenta moi positiva para apoiar o comercio local e dinamizar o consumo en Lalín. Alegrámonos de que se sigan dando pasos para a súa posta en marcha, aínda que seguimos considerando insuficiente a contía destinada polo goberno local”, sinalan os socialistas.

 PUBLICIDADE

Preme para obter máis información.

Neste sentido, lembran que o PSOE propón unha partida de arredor de 40.000 euros para desenvolver unha campaña máis ambiciosa e con maior impacto económico no tecido comercial da vila.

Por último, o grupo municipal socialista anuncia que formulará preguntas no próximo pleno municipal para coñecer en que situación real se atopa a campaña, cando entrará definitivamente en funcionamento e por que motivo xa se poden descargar bonos sen información pública previa nin comercios adheridos visibles.