top of page

Alba Forno devolverá "a transparencia ao Concello" e mellorará as webs para facelas prácticas

O PSOE de Lalín comprométese a dar acceso á información que solicite a veciñanza nun período menor aos 2 meses, “non como fixo este Goberno, que nos deu acceso despois de 4 meses ou máis”


Ecos da Comarca/Lalín

“A falta de transparencia e de democracia destes catro anos rematará o 28 de maio coa

chegada do PSOE á Alcaldía de Lalín”, asegura a candidata, Alba Forno. Nestes catro

anos, o grupo socialista "padeceu as trabas para o acceso á información e informes", por

iso considera que “isto ten que rematar”. Así mesmo, os datos que se publican nos

diferentes portais do Concello “deben ser veraces e non levar ao engano á cidadanía”.

Unha das medidas será mellorar o Portal de Transparencia e Goberno Aberto, integrando

no mesmo unha aplicación de participación cidadá. “Actualmente estas webs están

totalmente desactualizadas e teñen datos falsos, polo que é preciso poñelas ao día e con

datos reais, que sirvan de utilidade para a veciñanza”, expón a candidata. Engade que

estes portais deben ser claros e ter a disposición de todo o mundo as convocatorias,

prazos, bases e datas dos diferentes trámites que teñen dispoñibles os/as veciños/as.

“Actualmente para chegar ás bases ou á documentación precisa para facer unha

solicitude dunha axuda é preciso rebuscar nos portais. Son moitas as chamadas que

recibimos para axudarlle á xente a realizar estes trámites, que deberían ser algo sinxelo”,

puntualiza Forno.


A candidata comprométese a dar acceso á documentación e informes que solicite a

oposición ou a cidadanía en menos de dous meses. “É un auténtico escándalo o que

sufrimos nestes catro anos, nos que nos permitían ver documentación, moitas veces

incompleta, catro meses despois de habela solicitado. Isto non pode pasar porque o noso

traballo é fiscalizar as actuacións do Goberno e para iso é preciso revisar toda a

documentación, pero nun tempo prudente”, indica.

O grupo socialista mellorará as tecnoloxías e para iso empregará o software libre nos

sistemas informáticos do Concello así como na creación da nova infraestrutura dixital.

Tamén se asegura a protección dos datos xerados durante a contratación pública coa

finalidade de xerar privacidade e seguridade no fluxo da información.


Finalmente, a candidata asegura que publicará un informe anual do estado e evolución do

cumprimento do programa electoral e os cambios sobrevidos. “Vimos como este Goberno

non chegou a un 70% do programa cumprido e non rende contas de onde preferiu

investir. Nós comprometémonos a dar as explicacións necesarias de a onde se destina o

diñeiro da cidadanía”, conclúe Forno.





0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page