A Xunta súmase ás homenaxes ao Matemático Rodríguez como científico do ano

Xunto coa Real Academia Galega de Ciencias colaborará na divulgación da obra deste ilustre veciño de Bermés, Lalín, cunha exposición

Laura Moure/Lalín

O Consello deu luz verde ao convenio de colaboración entre o Goberno galego e a Real Academia Galega de Ciencias (RAGC) para impulsar a exposición José Rodríguez, o matemático do Bermés, unha iniciativa con que a Xunta se suma ás celebracións que homenaxean ao longo deste ano ao Matemático Rodríguez no bicentenario do seu falecemento.

Busto do Matemático Rodríguez en Bermés.

Esta iniciativa, a través das consellerías de Educación, Ciencia, Universidades e Formación Profesional e de Cultura, Lingua e Xuventude, contará cun financiamento de 65.000 euros co obxectivo de divulgar e dar a coñecer a figura e a obra do científico galego José Rodríguez coincidindo co 200 aniversario do seu falecemento. A exposición coincide co nomeamento deste ilustre veciño de Bermés (Lalín) como o científico galego do ano 2024.

Publicidade

Preme na imaxe para obter máis información.

Enmarcada nas actividades do Día da Ciencia en Galicia, unha celebración promovida pola RAGC, este traballo reivindica o valor da investigación científica a través de figuras destacadas como é o caso do Matemático Rodríguez. A mostra, que será itinerante, comezará o seu percorrido en Santiago de Compostela para despois viaxar ata Lalín -municipio que o viu nacer- e a Madrid.

osé Rodríguez, o matemático do Bermés pretende achegar ao público xeral o legado dun dos matemáticos máis relevantes de Galicia. José Rodríguez González destacou no século XIX polo seu traballo en diferentes ramas das Matemáticas e pola súa contribución ao desenvolvemento científico da súa época.

Publicidade

Preme na imaxe para obter máis información.

Promoción do talento galego 

Con esta mostra a Xunta de Galicia avanza na promoción do talento galego e na divulgación da nosa historia científica e cultural. Para iso, o convenio tamén establece as condicións de colaboración entre as distintas consellerías implicadas e a RAGC, permitindo que esta última dispoña dos fondos necesarios para a organización da exposición. Este proxecto subliña a importancia de preservar e difundir a memoria dos grandes científicos galegos, asegurando así que as novas xeracións coñezan e valoren a súa contribución ao avance do coñecemento.