A Xunta prorroga por 2 anos o informe ambiental e estratéxico para un novo espazo industrial en Melide

Ecos da Comarca/Melide

O PP de Melide informa que "a Xunta prorroga por dous anos o informe ambiental

estratéxico para habilitar un novo espazo de uso industrial en Melide ante a falta de avances do Concello". A resolución, apunta, "dá resposta á solicitude presentada esta mesma semana polo Goberno local e evita que o informe perda a súa vixencia despois de que en seis anos o Executivo melidense non lograse aprobar a modificación puntual das normas subsidiarias de planeamento á que fai referencia".

A Dirección Xeral de Calidade Ambiental e Sostibilidade da Xunta de Galicia, sinalan os populares melidenses, "acordou hoxe (polo venres) prorrogar por un prazo máximo de dous anos a vixencia do informe ambiental estratéxico relativo á Modificación puntual das normas subsidiarias de planeamento para a delimitación dun sector de solo urbanizable de uso industrial no concello de Melide".

Publicidade

Preme na imaxe para obter máis información do evento.

"Esta prórroga, que dá resposta á solicitude presentada esta mesma semana polo Goberno local, empezará a contar desde o día 5 de xullo e evita a caducidade do informe ambiental inicial emitido polo Executivo galego, que saíu publicado no Diario Oficial de Galicia do 5 de xullo de 2019 ante a falta de avances na tramitación desa modificación. Ese informe de 2019 xa recollía que perdería a súa vixencia e cesaría na produción

dos seus efectos se non se aprobaba o planeamento no prazo máximo de seis anos

desde a publicación no DOG, cousa que o Goberno local de Melide non fixo", acusa o PP.

Publicidade

Preme na imaxe se queres contactar connosco.

"Agardamos que o Concello tome nota a partir de agora e traballe para aprobar o planeamento deste sector de solo de uso industrial o antes posible, pois non é de recibo que seis anos foran insuficientes para poder materializar unha cuestión importante para o desenvolvemento industrial do municipio. De feito, en caso de que o informe ambiental estratéxico perda vixencia polo transcurso da prórroga, o promotor -o Concello- debería iniciar de novo o procedemento de avaliación ambiental estratéxica".