A Xunta pon en valor o castro de Doade de Lalín e a súa contorna a través dun campo de voluntariado

A actividade rematou onte despois de que mozos procedentes de Galicia, doutros puntos de España, de Italia e de México realizaran tarefas de conservación ambiental, de catalogación e divulgación etnográfica e de escavación na mámoa ‘a pena do santo’

Laura Moure/Lalín

Un grupo de mozos de entre 18 e 30 anos procedentes de Galicia, doutros puntos de España, de Italia e de México remataron onte a súa experiencia no campo de voluntariado organizado pola Xunta en Lalín e que ten como temáticas a arqueoloxía, o medio ambiente e a etnografía. A directora xeral de Xuventude, Participación e Voluntariado, Cristina Pichel, estivo este venres cos participantes nesta actividade que se enmarca na campaña de verán do Goberno galego.

Publicidade

Preme na imaxe se queres obter máis información do evento.

Baixo o nome de ‘Tradición en verde’, este campo con tres vertentes de traballo. Unha compoñente ambiental, na que os voluntarios realizan tarefas de limpeza das marxes do río Asneiro, recuperan e sinalizan a ruta dos muíños e a ruta prehistórica de Doade, e acondicionan a área recreativa do museo ‘Casa do Patrón’.

Así mesmo, a parte etnográfica desta proposta está centrada en labores de divulgación da cultura popular galega a través das actividades do museo ‘Casa do Patrón’, con participación en labores puntuais como a sega tradicional, a catalogación de fondos do museo ou a elaboración de guías e material e paneis informativos.

A terceira compoñente deste campo é a arqueolóxica, pois os participantes colaboran na campaña de escavación e catalogación de pezas do castro de Doade. Así, axudan na recuperación da mámoa coñecida como ‘a pena do santo’.

Ademais, a proposta inclúe outras actividades de ocio como visitas ao embalse de Portodemouros e a fraga de Catasós; actividades deportivas en canoa, caiac e de hípica; desfrutar da piscina fluvial de Vilatuxe; obradoiros de cestaría; xogos de xeolocalización con GPS; escape room; e veladas de lendas tradicionais galegas.

Publicidade

Preme na imaxe se queres contactar connosco.

A campaña de verán da Xunta para este ano 2023 é a máis ampla da historia con máis de 11.200 prazas en distintas actividades, pero tamén é a máis variada e accesible. Nela ofrécense actividades para todas as idades e gustos como campamentos, campos de voluntariado, minicampamentos ou intercambios con outras Comunidades. O obxectivo é que a mocidade pase uns días de aprendizaxe e diversión, que os pais conten cun servizo de conciliación para esta época estival e dinamizar o sector do ocio e o tempo libre.