top of page
Perruquería Marisa.gif

A Xunta pon a exposición pública os terreos da Área Recreativa "O Abeseiro" en Vila de Cruces

O Concello cruceño tilda isto "dunha excelente noticia xa que a creación de áreas recreativas é fundamental para mellorar a calidade de vida da nosa vila"


Laura Moure/Vila de Cruces

A Xunta puxo a exposición pública os terreos necesarios para a creación da nova Área Recreativa de "O Abeseiro" e procederase á cualificación dos 16.476 m2 como zona verde do sistema local de espazos libres, tal e como informa o Concello cruceño e tilda isto de "excelente noticia".

Desde este martes e ata o 1 de xuño, a Consellería de Medio Ambiente expoñerá ao público o documento ambiental estratéxico do Plan Especial de Infraestruturas e Dotacións (PEID) “O Abeseiro”, o que permitirá a Vila de Cruces dispor de máis espazo verde de lecer nesta parroquia de Toiriz.


"Este anuncio é un gran paso adiante para Vila de Cruces, xa que a creación de áreas recreativas é fundamental para mellorar a calidade de vida da nosa vila. A promoción de actividades ao aire libre e da vida saudable son elementos clave para o benestar da nosa poboación, especialmente para aqueles veciños maiores, que representan o 70% da nosa comunidade", subliña o ente local. "A zona verde de "O Abeseiro" será unha adición valiosa ás nosas áreas recreativas existentes, as cales estamos ampliando".

Ante isto, sinala que "agradecemos á Xunta o seu compromiso co benestar da nosa comunidade e esperamos traballar con eles no futuro. O Concello de Vila de Cruces será un referente de lecer na comarca con esta iniciativa liderada por Luis Taboada para mellorar e poñer en valor as áreas recreativas da nosa comunidade. Cunha inversión de máis de 200.000 euros, a creación da área recreativa de "O Abeseiro" é un proxecto ambicioso que beneficiará a todos os cruceños e cruceñas".


E recalca que "dende goberno de Xuntos están emocionados de compartir esta nova cos veciños e veciñas, e seguiran traballando para facer de Vila de Cruces unha vila máis saudable".


0 comentarios
IRS.gif
Copia de ¡TU Anuncio!.gif
bottom of page