A Xunta licita por preto de 3,4 M€ a ampliación do Instituto Ramón Mª Aller Ulloa de Lalín

Construirase un novo edifico de preto de 2.200 m² para aulas e talleres dos ciclos de FP da familia de Informática e comunicacións, así como un Polo Creativo

Laura Moure/Lalín

A Xunta vén de licitar por preto de 3,4M€ a ampliación do Instituto IES Ramón Mª Aller Ulloa de Lalín. Deste xeito, dáse o impulso definitivo a esta actuación, logo de incrementar de xeito significativo o orzamento previsto inicialmente para esta obra (2,5M€), co obxectivo de cubrir as necesidades do centro.

A intervención, que ten un prazo de execución de 12 meses, consiste na construción dun novo edificio de 2.164 m² no que se situarán espazos para os ciclos da familia profesional de Informática e comunicacións, na que se centra a oferta do centro. A maiores, realizaranse intervencións puntuais nas edificacións existentes, como a apertura de xanelas e o acondicionamento dun almacén, entre outras.

Publicidade

Preme na imaxe para obter máis información do evento.

No que atinxe ao novo edificio, contará con tres plantas e estará dotado de aulas, talleres, laboratorio, un espazo de foro, diversos locais técnicos e un Polo Creativo, que dará servizo a todo o alumnado do instituto. Estará situado na zona sur da parcela, conectado ao edificio actual, terá estrutura de formigón con acabado exterior en sistema de illamento térmico SATE e cuberta inclinada de panel sándwich.

Publicidade

Preme na imaxe se queres contactar connosco.

Esta nova actuación eleva a preto de 7M€ o investimento da Consellería de Educación, Ciencia, Universidades e FP nos centros educativos de Lalín ao abeiro do Plan de nova arquitectura pedagóxica, con actuacións tan salientables como a central de biomasa do Colexio CEIP Xesús Golmar (1,3M€), a rehabilitación integral do CEIP Xoaquín Loriga (661.000 €), ou a renovación de cuberta e fiestras do CEIP Plurilingüe Vicente Arias de la Maza (538.000€) e do CEIP Plurilingüe Varela Buxán (356.000€). Ademais, están xa adxudicadas as obras de reforma da instalación contra incendios do IES Laxeiro por 130.000 €.