Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

A Xunta licita a renovación do firme e o balizamento da estrada autonómica entre Rodeiro e Agolada

As empresas teñen de prazo ata o vindeiro 19 de abril para presentar ofertas e a obra

comezará este verán cun prazo de execución de seis meses

Asistentes á visita, hoxe, en Adelán.


Laura Moure/Deza

A Xunta de Galicia, a través da Consellería de Infraestruturas e Mobilidade, licitou hoxe as obras de renovación e reparación integral do firme e modernización do balizamento e da sinalización da estrada autonómica PO-212, entre os concellos de Rodeiro e Agolada, cun orzamento de 1.110.769 euros.

O delegado territorial da Xunta en Pontevedra, Luís López, anunciou esta mellora nunha visita a esta vía autonómica no lugar de Adelán, na compaña dos alcaldes de Rodeiro e Agolada, Rubén Quintá e Luís Calvo, respectivamente. O representante autonómico explicou que esta actuación “é necesaria, xa que a pavimentación se foi deteriorando pola carga de tráfico, o paso do tempo e os efectos da climatoloxía e por iso dende a Xunta imos actuar de inmediato para tentar que estea rematada neste ano”.

4.700 veciños

As empresas interesadas teñen de prazo ata o vindeiro 19 de abril para presentar as súas ofertas. A actuación de reforzo de firme realizarase ao longo dos 15,6 quilómetros desta estrada co obxectivo de mellorar a súa seguridade viaria e as condicións de condución e circulatorias, beneficiando aos case 4.700 veciños que a empregan de xeito habitual. Deste xeito, proponse unha actuación diferenciada, segundo o estado do firme nas diversas zonas, que incluirá o fresado e a eliminación de cinco centímetros da capa de rodadura, naqueles puntos onde está máis prexudicado e que suman 250.000 metros cadrados, e a súa posterior reposición con máis de 6.000 toneladas de mestura bituminosa en quente previa aplicación dunha rega de adherencia. Así mesmo, está previsto que, en toda a vía, se aplique microaglomerado en frío para minimizar o futuro desgaste da capa de rodadura e favorecer a adherencia dos vehículos.

Paralelamente, a Xunta vai repoñer todas as marcas viarias: a sinalización do eixo central da calzada e os bordes da estrada e vai colocar máis de 1.500 elementos de balizamento, co formato de captafaros, para incrementar a visibilidade. Cómpre sinalar que tamén está previsto que, en aras da seguridade, se reduza lixeiramente o ancho dos carrís centrais para establecer algunhas zonas intermedias cebreadas no marco das actuacións complementarias de modernización da estrada.

Luís López, que avanzou que a obra comezará este verán tras a correspondente tramitación da contratación e que conta cun prazo de execución de seis meses, destacou “o elevado grao de compromiso da Xunta de Galicia coas infraestruturas, que están a recibir uns fortes investimentos en toda a provincia para mantelas nas mellores condicións e que, no caso do Deza, vanse plasmar nesta conexión entre Rodeiro e Agolada para favorecer a mobilidade entre dous concellos cunha elevada relación e mobilidade”.

257 vistas0 comentarios
IRS.jpg

ESPAZO DISPOÑIBLE PARA ANUNCIARSE