A Xunta invita a Deza e Tabeirós a coñecer os distintos programas de axudas en materia de vivenda

Esta nova sesión dos encontros informativos Construíndo Fogar terá lugar hoxe, luns, ás 10:30 horas na Academia Galega de Seguridade Pública (Agasp), na Estrada

Laura Moure/Deza

A Xunta de Galicia invita ao tecido social das comarca de Deza e Tabeirós-Terra de Montes a coñecer os distintos programas e liñas de axudas en materia de vivenda ás que poden optar os cidadáns e os concellos. Esta nova sesión dos encontros informativos Construíndo Fogar terá lugar hoxe, luns, 4 de abril, ás 10:30 horas, na Academia Galega de Seguridade Pública (Agasp), na Estrada (avenida da Cultura, s/n), e contará coa presenza de persoal técnico do Instituto Galego da Vivenda e Solo (IGVS), para informar dos detalles de máis dunha trintena de liñas distintas de incentivos e resolver as dúbidas dos asistentes.

Trátase do terceiro encontro que se celebra na provincia de Pontevedra e o quinto na Comunidade. Está aberto ao público en xeral e están convocados representantes dos concellos de Agolada, A Estrada, Dozón, Lalín, Forcarei, Rodeiro, Silleda e Vila de Cruces.

Asemade, tamén se invitou a entidades, como os colexios oficiais de arquitectos, enxeñeiros técnicos e peritos agrícolas de Pontevedra; e a empresas do sector da vivenda e da rehabilitación edificatoria, como inmobiliarias, xestores de comunidades de veciños e da propiedade e asociacións de empresarios e da construción. O obxectivo é informar dos requisitos que os beneficiarios de cada axuda deben cumprir, así como dos trámites que deben realizar ante a Xunta para acceder aos incentivos dispoñibles ao abeiro da convocatoria de 2022, tanto dos programas que xa están abertos como daqueles pendentes de publicar a súa convocatoria.

Así, o IGVS dará conta dos programas dispoñibles para fomentar a rehabilitación do parque de vivendas de Galicia. A maioría están dirixidos aos particulares, pero tamén existen outros que son exclusivamente para os concellos. Ademais, brindarase información sobre as distintas liñas de axudas para facilitar o acceso a unha vivenda en réxime de compra ou de alugueiro. No encontro tamén se presentarán aqueles programas que benefician de xeito particular aos concellos da zona, como son as axudas á área de rehabilitación supramunicipal dos Camiños de Santiago, xa que pasan o Camiño de Inverno e a Vía da Prata.

Nova oficina de rehabilitación

A Consellería de Medio Ambiente considera necesarios e fundamentais estes encontros, para dar a coñecer a existencia das liñas de subvencións dispoñibles; animar aos posibles beneficiarios a presentar unha solicitude, ofrecendo información de directa, práctica e útil, e sobre todo, para brindar o acceso aos recursos públicos ao destinatario final dos mesmos: a sociedade galega.

Así mesmo, este encontro servirá para presentar a nova Oficina de rehabilitación de vivenda, posta en marcha recentemente pola Xunta e que está chamada a ser o novo punto informativo para asesorar e dar a coñecer entre os seus potenciais beneficiarios os novos programas de axudas con fondos europeos en materia residencial. Esta oficina xa está en funcionamento e permanece aberta de luns a venres polas mañás, en horario de 9 a 14 horas. Os interesados teñen a opción de facer consultas por teléfono, a través do número 881 045 897, o mesmo ao que hai que chamar para pedir cita previa en caso de preferir atención presencial en Santiago de Compostela.