A Xunta inviste preto de 120.000 euros en melloras viarias do parque empresarial Área 33 de Silleda

Na comarca de Deza-Tabeirós tamén se beneficiaron os polígonos de Lalín e Cruces

Laura Moure/Silleda

O delegado territorial da Xunta en Pontevedra, Agustín Reguera, visitou onte o Polígono Industrial Área 33, no concello de Silleda, con motivo das axudas da Xunta encamiñadas á habilitación e mellora de infraestruturas dos parques empresariais galegos. Acompañado pola directora territorial de Economía e Industria, Beatriz López, e pola alcaldesa de Silleda, Paula Fernández, e outros membros da corporación municipal, o delegado comprobou o avance das obras de mellora de varias infraestruturas viarias do polígono, que permitirán asfaltar unha nova capa de rodadura e repintar as marcas viais.

Trátase dunha das 13 actuacións que se levarán a cabo na provincia de Pontevedra a través desta liña de axudas e que, no caso de Silleda, conta cun financiamento da Xunta de preto de 120.000 euros.

Na comarca de Deza-Tabeirós, ademais da xa nomeada actuación no Polígono Área 33, as axudas tamén permitirán mellorar as infraestruturas viarias do parque empresarial Lalín 2000, en Lalín, e a substitución parcial dos colectores con verteduras á depuradora municipal de Vila de Cruces. Estas actuacións contan cunha achega autonómica de 78.898 euros e 120.000 euros respectivamente.

Publicidade

Preme na imaxe se queres obter máis información.

Cabe destacar que, en total, esta liña de axudas deixará preto de 800.000 euros na provincia. Neste sentido, Agustín Reguera quixo poñer en valor a “importancia de seguir

colaborando desde as institucións co tecido empresarial galego, non só a través de axudas específicas para cada sector, senón tamén mellorando as infraestruturas para que as empresas poidan desenvolver as súas actividades de forma máis eficiente e cómoda”.

Publicidade

Preme na imaxe se queres contactar connosco.

O delegado territorial aproveitou para lembrar o importante papel que ten esta comarca nos orzamentos da Xunta para o 2025: “Os orzamentos contemplan varias actuación importantes que van repercutir directamente a favor do empresariado desta comarca”,

asegurou o Reguera facendo referencia a partidas como 4,4 millóns de euros orzamentados para a ampliación do polígono Lalín 2000, ou á aposta pola Autovía AG-59,

que conta cunha achega de máis de 23 millóns de euros.