A Xunta formaliza a venda das dúas últimas parcelas dispoñibles no parque empresarial de Silleda

O Goberno galego está a impulsar a creación de novo solo industrial nas comarcas do Deza e Tabeirós coa ampliación dos polígonos de Lalín 2000 e Toedo (A Estrada)

Ecos da Comarca/Silleda

A Xunta de Galicia vén de formalizar a través da Sociedade Xestión do Solo de Galicia (Xestur), a venta das dúas últimas parcelas dispoñibles no parque empresarial de Silleda que ten unha capacidade total de 289.495 m2.

En concreto, a adxudicación destas parcelas que suman unha superficie de 5.031 metros cadrados, e que contaban cunha bonificación no seu prezo de venda do 50 %, fíxose a unha empresa especializada en reciclaxe de pezas de automoción.

Deste xeito, a Xunta avanza na súa estratexia de favorecer a implantación de empresas, facilitando o acceso a solo industrial en condicións vantaxosas e cos servizos necesarios para desenvolver a súa actividade.

Asemade, o Goberno galego está a desenvolver outros parques empresariais en toda Galicia para crear un tecido empresarial forte e competitivo, dotándoo de máis solo empresarial e coa base nun modelo de desenvolvemento industrial ordenado, eficiente e respectuoso co medio ambiente, que atraia investimentos, favoreza a creación de emprego e garanta o equilibrio territorial.

 PUBLICIDADE

Preme na imaxe para obter máis información do evento.

Lalín 2000 e Toedo

Neste sentido, na contorna de Silleda está en marcha a ampliación do parque empresarial Lalín 2000, que suporá contar con 313.497 m2 máis de solo; e a ampliación do polígono industrial de Toedo situado na Estrada, cuxo plan de ordenamento foi aprobado a semana pasada polo Consello da Xunta e que permitirá incrementar en 156.685 m2 a súa capacidade actual.

No caso da provincia de Pontevedra tamén se encontran actualmente en tramitación os instrumentos de ordenación dos parques empresariais de Fragamoreira (Poio), a ampliación do parque empresarial do Campiño, o de Louredo (Mos-Redondela), a ampliación do Pousadoiro (Vilagarcía de Arousa) e a ampliación da MI da PLISAN (Salvaterra-As Neves). Ademais, encontrase en tramitación o proxecto de reurbanización da Central de Transportes e Terminal Intermodal de Ponte Caldelas.

PUBLICIDADE

Preme na imaxe se queres contactar connosco.

En definitiva, actualmente encóntrase en tramitación coas distintas actuacións case tres millóns de metros cadrados de solo empresarial na provincia de Pontevedra e que nos vindeiros anos porase á disposición das empresas.