A Xunta entrega equipamento a Protección Civil de Dozón, Lalín e Vila de Cruces

O GES de Monterroso recibiu unha bomba rural pesada

Laura Moure/Deza

O delegado territorial da Xunta en Pontevedra, Agustín Reguera, acompañou esta semana ao conselleiro de Presidencia, Xustiza e Deportes, Diego Calvo, no acto de entrega de diverso equipamento de emerxencias a 86 Agrupacións de Voluntarios de Protección Civil (AVPC) doutros tantos concellos ou mancomunidades, entre elas tres da comarca do Deza-Tabeirós e 17 pertencentes a concellos da área territorial de Pontevedra.

Trátase de dous remolques, que foron entregados ás agrupacións de Vila de Cruces e Dozón; tres tendas de campaña para a atención ás emerxencias para Tui, Catoira e Vilaboa; tres ferramentas eléctricas para Vilagarcía de Arousa, Poio e Lalín; sete kits de material loxístico para a seguridade viaria para Vilanova de Arousa, Valga, O Rosal, Ponteareas, Mondariz (Oitavén-Tea), Cuntis e Cerdedo-Cotobade; e dous de material para actuacións no medio acuático para Tomiño e Marín. En total máis de 87.000 euros investidos en dotar das mellores ferramentas ás distintas agrupacións.

No acto, desenvolvido na Academia Galega de Seguridade Pública (Agasp) participaron

tamén o director xeral de Emerxencias e Interior, Santiago Villanueva e a delegada territorial da Xunta na Coruña, Belén do Campo, así como representantes dos concellos e

das AVPC que recibiron as dotacións.

Publicidade

Preme na imaxe se queres saber máis deste evento.

Os remolques entregados contan con electro bomba somerxible, motobomba para augas residuais, xerador de electricidade portátil, motoserra, rozadoira, torre de iluminación e kit

de balizamento e sinalización. Pola súa banda, as tendas de campaña teñen teitos de 4x4

metros, estruturas reforzadas de aluminio e kit de iluminación de baixo consumo, entre

outras características. En canto ás ferramentas eléctricas, o kit consta de amoladora, serra sable, motoserra con mochila para transporte, taladro percutor, miniarrancador, baterías e

cargadores.

O material loxístico para a seguridade viaria inclúe unha mampara de protección visual plegable, soportes telescópicos antivento, pack de sinalización, tetrápodos con reflectantes, balizas sincronizables e lanternas. Por último, o kit de material para

actuacións no medio acuático consiste nunha cadeira anfibia para adultos, unha táboa de

rescate ríxida, un tubo de rescate e unha caixa de primeiros auxilios.

O equipamento entregado enmárcase na orde de axudas en equipamentos de emerxencias aos concellos, mancomunidades e agrupacións de concellos galegos de

menos de 50.000 habitantes que conten con Agrupacións de Voluntarios de Protección Civil (AVPC). Dos 86 colectivos beneficiarios desta convocatoria, 25 son da provincia da

Coruña, 9 da de Lugo, 28 da de Ourense e 24 da de Pontevedra. A actuación está

cofinanciada pola Unión Europea, a través do programa Feder de Galicia. Reguera aproveitou a ocasión para poñer en valor “o importante traballo que levan a cabo estes voluntarios e voluntarias en moitos concellos, ata o punto de tornarse un equipo imprescindible de apoio ás autoridades, non só en caso de emerxencia, senón tamén en

eventos cunha gran asistencia”.

Pola súa banda, o conselleiro reafirmou o compromiso da Xunta cos servizos de

emerxencias a pesar de ser competencia local -dos concellos de máis de 20.000 habitantes e das deputacións provinciais nos municipios de menor poboación-. Nesta liña,

a Xunta realizou nos últimos anos un importante investimento para reforzar o equipamento

aos servizos de emerxencias municipais. Só no caso de Protección Civil, as achegas dos

últimos anos para o financiamento da súa actividade, equipamento e formación suman

máis de 22 millóns de euros. De feito, neste ano, preto de 200 AVPC se beneficiaron da

orde anual para gastos de mantemento, dotada con 340.000 euros.

Publicidade

Preme na imaxe para contactar con nós.

Máis de 48.000 operativos en 2023

Diego Calvo destacou a importancia do labor das Agrupacións de Voluntarios de Protección Civil, non só como servizo de emerxencias local, senón tamén como rede que

actúa en todo o territorio. Só en 2023 estes colectivos participaron en máis de 48.000

operativos no conxunto de Galicia. Referiuse tamén á importancia da formación dos

membros destas agrupacións, que ao longo do último ano dispuxeron de case un cento de

cursos na Academia Galega de Seguridade Pública específicos para a súa preparación. As accións formativas sumaron preto de 2.000 participantes.

Neste marco de apoio aos servizos de emerxencias locais, no que vai de ano a Xunta tamén entregou diversas dotacións a catro Grupos de Emerxencias Supramunicipais (GES). Así, os GES de Mos e A Guarda recibiron senllos furgón de servizos varios, e os de

Brión, Monterroso e Maceda cadansúa bomba rural pesada. Este equipamento supuxo un

investimento de case 900.000 euros. O investimento só en equipamento para servizos de

emerxencias municipais da comunidade, tanto GES como Protección Civil, supera os 27

millóns de euros nos últimos anos.