Perruquería Marisa.gif

A Xunta e o CB Breogán promoverán a práctica do baloncesto ao aire libre en Palas de Rei o día 26

Esta iniciativa, que tamén chegará a outros catro municipios lucences, consistirá en actividades gratuítas e inclusivas dirixidas especialmente aos máis novos


Laura Moure/Palas de Rei

A Xunta de Galicia e o CB Breogán promoverán a práctica do baloncesto ao aire libre en cinco municipios lugueses do Camiño de Santiago, con actividades gratuítas dirixidas especialmente aos máis novos e inclusivas, xa que estarán adaptadas ás capacidades físicas dos diferentes participantes. Entre estes concellos figura Palas de Rei.

Así o anunciaron este xoves durante a presentación da iniciativa na Delegación Territorial da Xunta o delegado territorial de Lugo, Javier Arias, e o director xeral do club, Tito Díaz, que estiveron acompañados por representantes municipais dos concellos involucrados: Guntín -que acollerá o programa o 5 de setembro -; Friol – o 12 de setembro -; Begonte – 19 de setembro -; Palas de Rei -26 de setembro -; e Baleira – 3 de outubro -. Tamén acudiron os xogadores Erik e Sergi Quintela e a mascota Maximus.

O programa O Breo no Camiño, apoiado pola Administración autonómica a través de O teu Xacobeo, incluirá talleres de baloncesto de iniciación ou perfeccionamento en zonas abertas -prazas, xardíns, espazos naturais...-, para o que instalarán canastras portátiles. A inscrición será de balde e precisa rexistro previo. O 20% das prazas estará reservado para persoas en risco de exclusión social, dependentes ou con escasos recursos.

Divulgación

Xogadores e técnicos do Breogán, acompañados por Maximus, realizarán treitos do Camiño nas respectivas localidades nas que se desenvolvan as actividades e divulgarán todas as accións a través de páxinas web e das redes sociais. Farán fincapé no respecto polo medio ambiente, xa que limparán plásticos que atopen ao seu paso e animarán aos peregrinos a apostar por materiais sostibles. Convidarán a algúns dos percorridos a artistas de diversas disciplinas, como o cantante David Prado, compositor do himno oficial do club.

Javier Arias destacou o vínculo entre os principios solidarios do Xacobeo e o deporte” e subliñou que nas dúas primeiras edicións de O Teu Xacobeo, a Xunta concedeu achegas por valor total de 1,1 millóns de euros para apoiar 96 proxectos na provincia de Lugo que tiveron repercusión en 40 municipios.

“Poucos como o Breogán poden representar tan ben os valores do Camiño; e o noso mellor embaixador”, afirmou Arias, quen engadiu que “o esforzo, a constancia, o sacrificio, a unión e a deportividade son só algúns dos conceptos que teñen en común”.

“Mais aló da promoción que poden facer o club e os xogadores procedentes de distintos países, creo que o Breogán ten ferramentas moi potentes, polo que significa no mundo do baloncesto, para divulgar o Camiño e as practicas saudables”, explicou.

Por último, o delegado territorial desexou “éxito aos xogadores e ao equipo no inicio da Champions League e na tempada na ACB” e animou a que “todos os socios sigamos apoiando ao club como ata de agora coa renovación dos abonos que remata este domingo”

24 visualizaciones0 comentarios
IRS.gif
Copia de ¡TU Anuncio!.gif