A Xunta destaca en Lalín a cooperación co comercio local para impulsar o consumo e as vendas en Nadal

José González destacou os sete pobos recreados na capital de Deza, con preto de 70 casiñas abertas aos nenos e nenas por estas datas

Laura Moure/Lalín

O conselleiro de Emprego, Comercio e Emigración, José González, acompañado polo alcalde de Lalín, José Crespo, realizou o martes un percorrido polas Aldeas de Nadal do municipio, unha iniciativa que reúne sete pobos e preto de 70 casiñas abertas aos nenos e nenas e que está concibida para promover as visitas á vila e incentivar o comercio local e a hostalaría durante estas datas. Na visita, o conselleiro puxo de relevo os Escaparates Máxicos, un proxecto impulsado polo Concello que conta co apoio da Xunta para dinamizar e poñer en valor catro escaparates baleiros, nos que se recrean escenografías e estampas propias do Nadal, así como a fachada máxica dun establecemento hostaleiro da Praza de Abastos.

 Publicidade

Preme na imaxe para obter máis información.

Do mesmo xeito, José González celebrou o pulo dado ao comercio local a través de iniciativas como o concurso de escaparates dirixido aos comercios da vila e outro específico, posto en marcha por primeira vez, para os establecementos hostaleiros. Para o desenvolvemento destas accións, organizouse previamente un curso gratuíto de escaparatismo e decoración con base artística destinado tanto a comerciantes como a hostaleiros e que —segundo sinalou— repetiu os bos resultados do ano pasado, non só coa ollada posta nestas datas, senón tamén para que as persoas participantes poidan aplicar na súa actividade do día a día.

Publicidade

Preme para contactar con nós e pregunta polas tarifas que son unha bicoca!

Segundo explicou o conselleiro, todas estas actuacións amosan a importancia de xerar sinerxías nas programacións do Nadal e de implicar o comercio como eixe fundamental de dinamización, contribuíndo a reforzar a actividade económica, a vida nas rúas e o atractivo dos municipios nestas datas sinaladas. Nesa liña, engadiu que desde a Xunta se seguirá apoiando tanto as entidades locais como o sector do comercio, unindo forzas para seguir dándolle a este sector estratéxico o lugar que merece nas vilas e cidades.