A Xunta adxudica por máis de 1,1 M€ as obras da mellora do firme en dúas estradas na Ulloa

O contrato asinarase nos vindeiros días, e previsiblemente, a execución das obras comezará a principios do mes de setembro

Ecos da Comarca/A Ulloa

A Xunta vén de adxudicar por un investimento de máis de 1,1M€ as obras de mellora do firme en dúas estradas autonómicas da provincia de Lugo ao seu paso polos concellos de Monterroso, Taboada e Palas de Rei. O contrato, adxudicado á empresa Construcciones Leonardo Miguélez, S.L., asinarase nos vindeiros días, e previsiblemente, a execución das obras comezará a principios do mes de setembro.

A actuación, que terá un prazo de execución de seis meses, busca incrementar a comodidade e a seguridade viaria dos usuarios das estradas LU-212, que une Taboada e Monterroso, e a LU-221, que vai de Monterroso a Palas de Rei.

Publicidade

Preme na imaxe para obter máis información do evento.

Deste xeito, as intervencións permitirán actuar e mellorar o firme naquelas zonas onde é necesario ao longo dos arredor de 20 km  de lonxitude que suman estas dúas vías da Xunta, realizando reforzos localizados e puntuais do pavimento.

Os  traballos nestas 2 estradas autonómicas que conforman o eixe de comunicación Taboada-Monterroso-Palas de Rei é reparar e renovar o firme nas zonas onde é preciso actuar para adecualo ás necesidades de durabilidade e funcionais das propias vías, co fin último de garantir a seguridade a comodidade nos desprazamentos dos veciños.

Publicidade

Preme na imaxe para obter máis información.

Repararanse posibles fisuras e cuarteos, renovando o firme nas zonas nas que este se atope máis deteriorado nestas dúas vías de titularidade autonómica que soportan un tráfico que se sitúa arredor dos 2.200 vehículos ao día.